Ultaralyq kelisim - Qazaqstannyń uly baılyǵy - Q. Mamsýrov

ALMATY. QazAqparat - «Ultaralyq kelisim - Qazaqstannyń uly baılyǵy. mánge aınaldy». Búgin Almatyda ótken «Birlik pen yntymaq - el órkendeýiniń tuǵyry» atty dóńgelek ústel barysynda Almaty qalasyndaǵy osetın etnomádenı birlestiginiń tóraǵasy Qazbek Mamsýrov osyndaı pikir bildirdi.

Onyń aıtýynsha, qazirgi daǵdarys jaılaǵan álemde ultaralyq kelisimniń mańyzy artýda.

«Bul jerde Qazaqstan halqy Assambleıasyna júkteletin mindetter eselene túsedi. Aldaǵy 18 sáýir kúni Astanada ótetin Assambleıanyń kezekti 21-sessııa jańa baǵyt-baǵdardy aıqyndap beredi. Búgingi dóńgelek ústel - sol sessııaǵa daıyndyq sharasy. Qazir qalada 100 ulttyń ókili tatý-tátti ómir súrýde. Al elimiz boıynsha 140-tan asady. Bizdi biriktirip otyrǵan - Dostyq! Aldaǵy sessııadan kúterimiz kóp», - dedi Qazbek Mamsýrov.

Óz kezeginde «Yntymaq» depýtattyq tobynyń basshysy, máslıhat depýtaty Ahmetjan Shardınov: «Qazir álem qatty saıasattanyp ketti. Ýkraınada, basqa da elderde ne bolyp jatqanyn ózderińiz bilesizder. Sol úshin Qazaqstanda ultaralyq dostyqty, ózara túsinistikti saqtaýda Qazaqstan halqy Assambleıasynyń róli, oǵan júkteletin mindetter artyp otyr. Búgin sol aldaǵy bolatyn sessııaǵa daıyndyq retinde etnomádenı birlestikterdiń basshylaryn shaqyryp, olardyń talap-tilekterin, usynystaryn tyńdaýdy uıǵardyq. Elbasy qashanda: «Ultaralyq kelisim, dostyq - Qazaqstan halqynyń órkendeýiniń negizi. Bul ishki saıasattyń dińgegi» - degendi aıtyp keledi. Elimizde ultaralyq kelisim nyǵaıa túsken saıyn ekonomıka da, halyqtyń áleýmettik jaǵdaıy da nyǵaıa túspek», - dedi.

Esterińizge sala keteıik, «NurOtan» partııasynyń Almaty qalalyq fılıaly uıymdastyrǵan dóńgelek ústelge 20-dan astam qalalyq etnomádenı birlestikterdiń basshylary qatysyp, aldaǵy sessııaǵa baılanysty oı-pikirlerin ortaǵa saldy.