Ultaralyq máselelerdi sheshetin JI platformasy jasalýy múmkin

ASTANA. KAZINFORM – Sarapshylar ultaralyq máselelerdi sheshetin JI jasaýdy usyndy. Platforma problema ulǵaıýynyń aldyn alyp, turǵyndarǵa medıatsııalyq kómek beredi.

Bul týraly QHA Respýblıkalyq etnomedıatsııa keńesiniń tóraǵasy Kazinform tilshisine bergen suhbatynda aıtty.

– Qazaqstan halqy úshin paıdaly bolatyn «AI medıator» degen platformany júzege asyrýdy usynamyn. Bul – azamattar arasyndaǵy daýlardy beıtarap túrde sheshýge baǵyttalǵan jasandy ıntellekt tehnologııasyna negizdelgen júıe bolýy kerek. JI daýlardy saraptap, túrli sheshý nusqalaryn usyna otyryp, áleýmettik shıelenisterdiń aldyn alýǵa járdemdesedi. Eger azamattar arasyndaǵy másele kúrdeli bolsa, JI platformasy kásibı medıatordyń kómegi qajet ekenin anyqtap, tıisti mamandy usyna alady, – deıdi Sherzod Pýlatov.

Ózbek etnomádenı birlestiginiń tóraǵasy platforma halyqtar arasyndaǵy ahýaldy baqylaýda ustaý úshin mańyzdy kómekshi qural bolatynyn jetkizdi.

– Bul platformanyń tıimdi jumys isteýi úshin Big Data tehnologııalaryn qoldaný qajet. Úlken kólemdegi málimetterdi saraptaý arqyly qoǵamdaǵy qaıtalanyp otyrǵan máseleler men shıelenis oshaqtaryn erte anyqtap, aldyn alý sharalaryn jasaýǵa múmkindik týady. Bul ásirese ultaralyq máselelerge jol bermeý turǵysynan mańyzdy. Sonymen qatar bul júıe medıatorlardyń tsıfrlyq quzyretin arttyrýǵa yqpal etedi. Jasandy ıntellekt mamandarǵa etıkalyq baqylaý ornatý men keńestik kómek kórsetýge de qoldaý bolady. Ásirese etnomedıatsııa salasyndaǵy mamandardyń kásibı múmkindigin arttyryp, túrli ahýaldardy taldaýǵa jáne monıtorıng júrgizýge járdemdesedi. Óıtkeni halqymyzdyń arasynda túrli áleýmettik máseleler jıi týyndaıdy, jáne olardy ýaqytyly sheshý qajet. JI platformasy arqyly osy máselelerdi jyldap sozbaı, tıimdi sheshim tabýǵa bolady, – dedi ol.

Aıta keteıik, ІІM qyzmetke qabyldaý protsesine jasandy ıntellektini engizip jatyr.