Ultaralyq arazdyqty qozdyratyn kontentke qatysty jaýapkershilik kúsheıtildi

ASTANA. KAZINFORM — Sonymen qatar qoǵamdyq oryndarda bet-álpetin tanýǵa kedergi keltiretin kıim-keshek kıgeni úshin ákimshilik jaýapkershilik belgilenedi. Bul týraly Memleket keńesshi Erlan Qarın Telegram arnasynda jazdy.

Búgin Prezıdent memlekettik saıasattyń «Zań jáne Tártip» irgeli qaǵıdatyn praktıkalyq turǵyda odan ári iske asyrýǵa baǵyttalǵan birqatar zańǵa qol qoıdy.

Erlan Qarınniń sózinshe, atap aıtqanda, quqyq buzýshylyqtardyń aldyn alý týraly, quqyqqa qaıshy keletin kontenttiń taralýyn shekteý máseleleri týraly normalar bekitildi, Ákimshilik quqyq buzýshylyq týraly kodekske ózgerister men tolyqtyrýlar engizildi. 

Zańnamalyq jańashyldyqtarda:

— quqyqqa qaıshy keletin kontentti, onyń ishinde ultaralyq jáne konfessııaaralyq arazdyqty qozdyrýǵa baǵyttalǵan materıaldardy ornalastyryp, taratqany úshin ákimshilik jaýapkershilik engizý; 
— qoǵamdyq oryndarda tulǵanyń bet-álpetin tanýǵa kedergi keltiretin kıim-keshek kıgeni úshin ákimshilik jaýapkershilik belgileý;
— balalardy olardyń densaýlyǵy men damýyna zııan keltiretin aqparattan qorǵaýǵa qatysty jańa sharalar engizý.

— Zańnamany jetildirý quqyq buzýshylyqtardyń aldyn alýdyń tıimdi júıesin qalyptastyrýǵa, jalpy qoǵamdaǵy quqyqtyq tártipti nyǵaıtýǵa, azamattardyń qaýipsizdigi men quqyqtaryn qamtamasyz etýge baǵyttalǵan, — dep jazdy Erlan Qarın.

Budan buryn Prezıdent Quqyq buzýshylyq profılaktıkasy týraly zańdy, «Qazaqstan Respýblıkasynyń keıbir zańnamalyq aktilerine quqyq buzýshylyq profılaktıkasy jáne Qazaqstan Respýblıkasy zańnamasynyń jekelegen salalaryn jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna, «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Qazaqstan Respýblıkasynyń zańyna qol qoıǵanyn jazǵan edik.