Ultaralyq arazdyq qozdyrǵandar 20 jylǵa deıin bas bostandyǵynan aıyrylady
ASTANA. KAZINFORM — Qaraǵandy oblysynyń prokýratýrasy áleýmettik jelilerde ultaralyq sıpattaǵy janjaldardyń jıilep ketkenin eskertedi.
— Qazaqstan Respýblıkasynyń Konstıtýtsııasy, ultaralyq kelisimdi buzýǵa ákep soǵýy múmkin kez kelgen áreketke tyıym salady.
Ultaralyq arazdyq — qoǵamdyq turaqtylyq pen birlikke tónetin eń qaterli qaýipterdiń biri bolyp tabylady.
Mundaı áreketterdiń saldary — jappaı tártipsizdikterge, áleýmettik qurylymnyń buzylýyna, sondaı-aq etnostar men mádenı toptar arasyndaǵy tereń qaıshylyqtarǵa alyp kelýi múmkin, — delingen Qaraǵandy oblysynyń prokýratýrasy taratqan habarlamada.
Atalǵan quqyq buzýdyń jasalý alańy retinde «Instagram», «TikTok», «Threads» sııaqty áleýmettik jeliler tanylyp otyr. Bul platformalarda árbir qoldanýshyǵa pikir bildirý bostandyǵy berilgen.
— Alaıda, ultaralyq arazdyqty qozdyratyn pikirler Qylmystyq kodekstiń 174-babyna sáıkes qylmystyq jaýapkershilikke ákep soǵady. Atap aıtqanda, bul bap boıynsha 2 jyldan 7 jylǵa deıin bas bostandyǵynan aıyrý, al aýyr zardaptarǵa ákelgen jaǵdaıda — 12 jyldan 20 jylǵa deıin bas bostandyǵynan aıyrý jazasy qarastyrylǵan. Atalǵan áreketter ekstremıstik qylmystar sanatyna jatady.
Mundaı quqyq buzý úshin kináli tulǵalar belsendi ókinish bildirýine, jábirlenýshi tarappen tatýlasýyna, qylmystyq árekettiń eskirý merziminiń ótýine nemese raqymshylyq aktisine baılanysty qylmystyq jaýapkershilikten jáne jazadan bosatylmaıdy.
Tájirıbe kórsetkendeı, quqyq qorǵaý organdary tarapynan tulǵasy anyqtalǵannan keıin, kináli azamattar óz is-áreketine ókinip, kópshilik aldynda keshirim suraıdy. Alaıda bul olardyń jaýapkershiligin joıýǵa negiz bolmaıdy.
Osyǵan baılanysty barlyq azamatty zań talaptaryn saqtaýǵa, árbir habarlamaǵa jáne aıtylǵan sózderge jaýapkershilikpen qaraýǵa shaqyramyz.
Qoǵamdaǵy beıbitshilik, turaqtylyq pen senimdi tek ortaq quqyqtyq mádenıet pen ózara qurmet arqyly ǵana saqtap qalýǵa bolady, — delingen habarlamada.
Aıta ketelik Qaraǵandy turǵyny ultaralyq arazdyqty qozdyrdy degen kúdikpen qamaýǵa alynǵan edi.