Ult josparyna sáıkes sýdıalyqqa kandıdattar eń aldymen sot júıesi qyzmetkerlerinen iriktelinedi
«Ult josparyna sáıkes, sot júıesi týraly qoldanystaǵy zańnamaǵa ózgerister engizilgenin bilemiz. Bul óz kezeginde saladaǵy qadamdardy túbegeıli ózgertip otyr. Bárinen buryn, kadrlyq saıasatta 17 qadamda qarastyrylǵan ózgerister mańyzdy ekenin atap ótkim keledi. Sýdıalyq kadrlarǵa talaptar árqashan da joǵary bolǵan edi. Qoǵam sýdıalar kásibıliginiń artýyn talap etýde. Endi sýdıalyqqa kandıdattardy sot tájirıbesine jaqyndatýdamyz. 1 qańtardan bastap sýdıalar sot júıesi qyzmetkerlerinen, sot otyrystary hatshylarynan, kómekshiler arasynan, sondaı-aq protsesske qatysýshy bolyp tabylatyn prokýrorlar men qorǵaýshylar ishinen irikteýdemiz. Atalǵan qyzmetkerler shyn máninde sýdıalardyń jumysyn kúndelikti kórip júr, ıaǵnı qyzmettiń moraldy-psıhologııalyq aýyrtpalyǵyn, jumys kólemin baıqaýda jáne olar sýdıalyq jumystyń mánin naqty túsinedi. Buryndary árqaısysy emtıhan tapsyryp, sýdıalyqqa úmitker bolatyn edi. Osy oraıda tıisti sebepter boıynsha osy kandıdattardyń keıbirine bul qyzmet aýyr bolǵandyqtan, olar jumystarynan ketip qalyp júrdi. Al qazirgi talaptar kadrlardy irikteýde qadamdardy naqtylaýǵa múmkindik berýde», - dedi A. Sársenbaev.
Onyń aıtýynsha, 2016 jyldyń basynan kúshine engen zańnamaǵa sáıkes, sot júıesinde jumys istemeı, sýdıalyq laýazymǵa nıet bildirgen zańgerlerge kásibı mamandyǵynda mindetti 10 jyldyq eńbek ótili týraly talap qoıylady.
Sonymen qatar beıindi magıstratýrada oqyǵannan keıin, úmitker sot júıesinde 4 jyl jumys isteýge mindetti. Áıtpese, ol jalpy negizdemeler boıynsha konkýrstarǵa qatysatyn bolady.
Qosymsha jańashyldyqtarǵa toqtalatyn bolsaq, eki kezeńmen ótetin emtıhannan ózge, sýdıalyqqa kandıdattar «shyndyq detektorynan» synnan ótetin bolady.
