Ult ókilderi indetpen kúreske qalaı atsalysýda: Túımebaev baıandady
«Qazaqstan halqy Assambleıasy koronavırýs ınfektsııasyna qarsy kúres ýaqytynda óz jumysyn birneshe baǵytta uıymdastyrdy. «Biz birgemiz» qaıyrymdylyq aktsııasyna belsene qatysyp, 300 myńǵa jýyq adamǵa 276 mıllıon teńgeniń kómegi kórsetildi. Óńirlerde 400 myńnan astam medıtsınalyq betperde taratyldy.
Buǵan qosa, #bizbirgemiz, #bizúıdemiz biryńǵaı heshtegimen túrli chellendjder uıymdastyrylyp, hakim Abaıdyń 175 jyldyǵyna oraı aqyn óleńderin oqý estafetasy, Assambleıanyń 25 jyldyǵyna arnalǵan «Tuńǵysh Prezıdent jolymen» halyq ekspedıtsııasy, memlekettik tildiń qoldanys aıasyn keńeıtýdi kózdeıtin «Uly Dalanyń ultaralyq tili», «Mámile» jobalary jáne basqa da onlaın is-sharalardy jurtshylyq nazaryna usyndy. Atqarylǵan jumystar jóninde áleýmettik jelilerde 264 beınerolık, 192 beınesabaq jaryq kórdi. Ǵylymı-saraptamalyq taldaýlar da suranysqa saı jańa formatta júzege asty», - deıdi Qazaqstan halqy Assambleıasy Tóraǵasynyń orynbasary Janseıit Túımebaev.
J.Túımebaev atap ótkendeı, barlyq jobalar etnosaralyq tatýlyq pen qoǵamdyq kelisimdi nyǵaıtýdy kózdeı otyryp, tabysynan aırylǵan azamattarǵa qoldaý kórsetýge, karantın kezindegi is-sharalarǵa halyqty jumyldyrýǵa jáne zalalsyzdandyrý erejelerin saqtaýǵa baǵyttaldy.
Assambleıa sonyń ishinde «Biz birgemiz» qaıyrymdylyq aktsııasyna erekshe úles qosyp, yntymaq pen birliktiń úlgisin kórsetti. Qaıyrymdylyq sharaǵa etnomádenı birlestikter, Qoǵamdyq kelisim keńesteri, Kásipkerler qaýymdastyǵy, «Jańǵyrý joly» RJQ, QHA eriktiler qozǵalysynyń ortalyǵy, QHA qurylymdyq bólimsheleri atsalysty.
«Ekinshi dúnıejúzilik soǵys ardagerleri men múmkindigi shekteýli azamattarǵa, az qamtylǵan jáne kópbalaly otbasylarǵa, jalǵyzilikti zeınetkerler men ata-ana qamqorlyǵynan aırylǵan stýdentterge azyq-túlik sebetteri, antıseptık, dári-dármek jáne kúndelikti turmysqa qajetti basqa da hımııalyq zattar jetkizildi, áli de jalǵasýda.
Aımaqtardaǵy aldyńǵy shepte kúresip jatqan aq halatty abzal jandar men baqylaý beketterinde turǵan ishki ister salasynyń jeke quramy jáne tótenshe jaǵdaı qyzmetkerleri de umyt qalǵan joq. Máselen, Almaty qalasyndaǵy Qazaqstan uıǵyrlarynyń respýblıkalyq etnomádenı ortalyǵynyń fılıaly, «Ózbek mádenı ortalyǵy» qoǵamdyq birlestigi jáne «Ildash» tatar ortalyǵy qysqa merzim ishinde salynǵan jańa modýldik gospıtalge kómek retinde 350 elektrondyq termometrdi syıǵa tartty. Almaty oblysynyń № 11 shaǵyn stansasyna 1 mln teńgeniń 160 azyq-túlik paketin daıyndap, jedel-járdemniń 71 qyzmetkerine úlestirdi», - dedi QHA Tóraǵasynyń orynbasary.
Sondaı-aq Soltústik Qazaqstan oblysynyń «Assambleıa» korporatıvtik qory Petropavl qalalyq aýrýhanasynyń dárigerlerine obaǵa qarsy 35 qorǵanysh kostıýmin syıǵa tartty.
Qostanaı oblysy QHA eriktileri medıtsınalyq mekemelerdi soǵys ardagerleri men zeınetkerlerge arnalǵan tegin betperdemen qamtamasyz etti. Almaty oblysynyń erikti jastary Taldyqorǵan qalasyna kireberistegi sanıtarlyq beketterge túski as ázirledi.
Al Jambyl oblystyq «Vynhýa» dúngender qaýymdastyǵy Almaty qalasyna 4,5 mıllıon teńgege 3 tonna azyq-túlik jóneltti.
J.Túımebaevtyń aıtýynsha, indetke qarsy aqparattyq-túsindirý jumystaryn júrgizip, úıde otyrǵan azamattardyń ýaqytyn tıimdi ótkizý maqsatynda Qazaqstan halqy Assambleıasynyń el.kz aqparattyq-tanymdyq saıtymen biriktirilgen assembly.kz resmı portaly jáne áleýmettik jeliler arqyly #bizbirgemiz, #bizúıdemiz onlaın aktsııasyna da belsene úles qosty. Túrli chellendj bastap, beınesabaqtar men beınetúsirilimder toptamasy tartý etildi.
#ABAI175, «Tuńǵysh Prezıdent jolymen» halyq ekspedıtsııasy», «Uly Dalanyń ultaralyq tili», «Mámile» jobasy joǵary qoldaýǵa ıe boldy. Qaraǵandy qalasynyń «Dostyq úıi» qazaq tilin úırený dáristerine arnalǵan «Mámile» beınesabaqtary men aǵylshyn tilin onlaın túrde tegin oqytý kýrstarynyń tusaýyn kesti. Qostanaı jáne Soltústik Qazaqstan oblystary memlekettik tilge erekshe den qoıyp, «Mámile. Sıtýatıvti qazaq tili», Jambyl oblysy #KAZONLINE jobasyn jańa formatta usyndy. Soltústik Qazaqstan oblysynda qashyqtyqtan baǵalanatyn «Birligimiz jarasqan» ánshiler baıqaýy bastaý aldy.
M.Qozybaev atyndaǵy Soltústik Qazaqstan memlekettik ýnıversıtetinde ZOOM platformasy arqyly «Halyqtaný» ınteraktıvti bilim lektorıi tyńdaldy.
Astanalyq «Jańǵyrý joly» jastar qozǵalysy #ABAI175QHA chellendjin bastap, «Kózimniń qarasy» ánin túrli etnos aspaptarynda oryndady. Aıryqsha bastamany ózge aımaqtar birden ilip áketti.
Nur-Sultan qalalyq Dostyq úıinde Uly dalanyń kıeli muralaryn ulyqtaıtyn onlaın «Jyr ortalyǵy» ashylyp, ár halyqtyq ózine tán ańyz-dastandary men jyr-termeleri oryndalýda.
Sondaı-aq etno-mádenı birlestikter qýana kirisken ulttyq taǵamdardy nasıhattaýǵa arnalǵan «ÚıdeBirgeDaıyndaımyz» jobasy jurtshylyq arasynda úlken qyzyǵýshylyq týdyrdy. «Kazakh TV» telearnasynyń dırektory, Qazaqstan halqy Assambleıasy Jýrnalıster klýbynyń jetekshisi Maııa Bekbaevanyń uıytqy bolýymen «Kazakh TV» telegramm kanalynda kún saıyn jarııalanyp otyr.
Budan bólek, uıǵyr, koreı, nemis teatrlary onlaın spektaklder tartý etip, ınternet betterinde qoıylymdar kestesimen tanystyrdy.
Assembly.kz resmı portalynda QHA Ǵylymı-sarapshylyq keńesi ázirlegen kitaptar men zertteý eńbekterdiń elektrondy nusqasy oqyrmanǵa jol tartty.
QHA Ǵylymı-sarapshylyq keńesi ShYU-nyń eks-bas hatshysy M.Imanalıevtiń (Qyrǵyzstan), Shyǵys Eýropa jáne halyqaralyq zertteýler ortalyǵynyń qyzmetkeri B.Eshmenttiń (GFR), Halyqaralyq kóshi-qon uıymynyń bas halyqaralyq sarapshysy P.Kazmerkevıchtiń (Polsha) qatysýymen «Qazirgi zamannyń dilindegi etnostylyq jáne konfessıonaldyq: ádisnama jáne zertteý máseleleri» atty halyqaralyq ǵylymı-praktıkalyq online-semınar ótkizdi.
«Qazirgi tańda Assambleıa Qazaqstan halqynyń birligi kúni merekesin onlaın uıymdastyrý jáne atap ótý sharalaryna qyzý kirisip ketti. Óıtkeni eldegi jaǵdaıǵa baılanysty bıylǵy meıramnyń jóni bólek, sondyqtan QHA respýblıkalyq jáne óńirlik deńgeıde #Abai175, #1MAMYR #Birlikkuni, #BizBirgemiz biryńǵaı heshtegimen qyzyqty onlaın jobalar daıyndaý ústinde.
Biz memlekettiń damýy tarıhynda jalpyhalyqtyń birlik pen qoǵamdyq kelisimniń arqasynda eń qıyn kezeńderdi birge ótkizip, mol jetistikterge qol jetkizdik. Judyryqtaı jumyla bilsek, indetpen kúres jaǵdaıyndaǵy qıyndyqtardy da jeńip shyǵarymyzǵa esh kúmán joq», - dep túıindedi Janseıit Túımebaev.
