Ult múddesine birlesip jumys istesek talaı jeńiske jetemiz - Jeńis Seıdýllauly

NUR-SULTAN. QazAqparat – Memleket basshysy usynǵan baǵytta birlesip jumys istesek, elimiz áli talaı jeńisterdiń bıik tuǵyrynan kórinedi. Mundaı pikirdi Qazaqstannyń eńbek sińirgen qaıratkeri, kompozıtor Jeńis Seıdýllauly bildirdi, dep habarlaıdy QazAqparat tilshisi.

«Elimizdiń táýelsizdik jyldary qol jetkizgen jetistikteri, aldaǵy baǵyndyrar belesteri týraly Memleket basshysy Qasym-Jomart Kemelulynyń maqalasy bárimizge tereń oı qaldyrdy. Menińshe, árbir kózi ashyq, kókiregi oıaý sanaly azamat bul maqalany oqyp shyǵýy kerek. Bul kólemdi maqalada Prezıdent halqymyz úshin mańyzdy qundylyqtarǵa basa mán berdi. Memleket basshysynyń «Egemendigimizdiń máńgilik úshtaǵany – Altaıdan Atyraýǵa, Alataýdan Arqaǵa deıin keń kósilgen baıtaq jerimiz, ananyń aq sútimen boıymyzǵa daryǵan qasterli tilimiz jáne barlyq qıyndyqtardan halqymyzdy súrindirmeı alyp kele jatqan bereke-birligimiz. Biz osy úsh qundylyqty kózdiń qarashyǵyndaı saqtaımyz», degen sózinde-aq tereń saıası-fılosofııalyq maǵyna bar», - deıdi ol.

Onyń paıymynsha, el arasynda úlken serpilis týǵyzǵan maqaladaǵy kemel oılardy barynsha dáriptep, oı-sanamyzǵa berik ornyqtyrý – búgingi tańda biz úshin basty mindet.

«Uly dala eliniń bolashaǵy úshin mańyzy zor «Táýelsizdik bárinen qymbat» atty maqala árbir qazaqstandyqtyń rýhanı sana-sezimine ıgi yqpalyn tıgizeri anyq. Ult múddesi úshin Memleket basshysy usynǵan baǵytta birlesip jumys istesek, elimiz áli talaı jeńisterdiń bıik tuǵyrynan kórinetinine kámil senemin», - dedi Jeńis Seıdýllauly.