Ult kóshbasshysy N.Nazarbaevtyń jańa kitabynyń tusaýkeseri ótti
Bul týraly astana.kz saıtyna Nazarbaev ortalyǵynyń baspasóz qyzmeti málim etti.
Kitaptyń tanystyrylymyna QR Parlamentiniń depýtattary, QR Prezıdenti Ákimshiliginiń, «Nazarbaev ortalyǵy» MM qyzmetkerleri men oqý oryndarynyń, uıymdar men mádenı mekemelerdiń basshylary, óner qaıratkerleri, L.N.Gýmılev atyndaǵy Eýrazııa ulttyq ýnıversıtetiniń stýdentteri qatysty.
Tusaýkeser rásimin QR Prezıdenti Keńsesiniń basshysy Mahmud Qasymbekov ashty.
«Kitapta Qazaqstan Respýblıkasy Tuńǵysh Prezıdentiniń oılary men sóılegen sózderi, maqalalary men burynǵy týyndylaryndaǵy tujyrymdary toptastyrylǵan. Ár túrli taqyryptarǵa arnalǵan týyndylar jıyntyǵy onyń tulǵa, memleket qaıratkeri, saıasatker retindegi fılosofııalyq kredosyn aıqyndap qana qoımaıdy, tutastaı alǵanda, qazirgi Qazaqstannyń tarıhı kelbetin kóz aldyńyzǵa alyp keledi», - dep atap kórsetti M.Qasymbekov.
Oqyrmandar tarapynan úlken suranysqa ıe bolǵan buǵan deıin N.Á. Nazarbaevtyń «Týǵan elim - tiregim» (2001), «Ózekjardy oılar» (2003), «Oı bólistim halqymmen» (2006), «Myslıamı s narodom podelıýs» (2007) týyndylary jaryq kórip, bıblıografııalyq sırek dúnıelerge aınaldy.
Kitaptyń tanystyrý saltanatyna QazUÓÝ Qorqyt ata murasyn zerdelep, Ǵylymı zertteý ortalyǵynyń jetekshisi Myrzataı Joldasbekov, QR Parlamentiniń Májilis depýtattary Qýanysh Sultanov pen Aldan Smaıyl, QR Parlamentiniń Senat depýtaty Jabal Erǵalıev, Qazaqstan halqy Assambleıasy Ǵylymı-saraptaý keńesiniń hatshysy Natalıa Kalashnıkova, jazýshy Dúkenbaı Dosjan, S.Seıfýllın murajaıynyń dırektory, aqyn Nesipbek Aıtov, jáne basqalar qatysyp, pikir bildirdi.
Endi Tuńǵysh Prezıdent kitabynyń tusaýkeseri halyqtyń arasynda keńinen taralýy maqsatynda Qazaqstannyń basqa da aımaqtarynda ótedi.