«Ult qaıratkerleri jáne otandyq kósemsóz» atty respýblıkalyq ǵylymı-tájirıbelik konferentsııa ótti

Konferentsııanyń moderatory L.Gýmılev atyndaǵy EUÝ prorektory, UǴA korrespondent-múshesi Dıhan Qamzabekuly alǵysózdi aıtý úshin Bas redaktorlar klýbynyń prezıdenti, jýrnalıst-sarapshy Kenjebolat Joldybaıdy minberge shaqyrdy. «Ýnıversıtet pen klýbtyń ekijaqty yntymaqtastyq týraly memorandýmynyń nátıjesinde osy oqý ordasynyń qabyrǵasynda buǵan deıin de birneshe sharalar uıymdastyrdyq. Búgin kezekti konferentsııanyń sáti túsip otyr. Munyń ótýine qoldaý kórsetip otyrǵan L.Gýmılev atyndaǵy EUÝ-niń rektory, tarıh ǵylymdarynyń doktory, professor Erlan Battashulyna alǵysymyzdy bildiremiz. Jaqynda E.Sydyqov Halyqaralyq ǵylymı-tanymdyq «Máńgilik el» jýrnalynyń bas redaktory retinde bizdiń klýbqa múshe bolyp qabyldanǵandyǵyn, jaqynda arnaıy kýáligi tabys etiletindigin osy úlken jıyn barysynda qulaqqaǵys etkim keledi», - dedi K.Joldybaı.

Ústimizdegi jyly halqymyzdyń belgili qaıratkerleri, aqyn-jazýshylary Sáken Seıfýllın, Beıimbet Maılın, Іlııas Jansúgirov, Turar Rysqulov, Sultanbek Qojanov, Haıretdın Bolǵanbaı, Sábıt Dónentaev 120 jasqa tolmaq. Osy oraıda, «Qazaqstan-2050» Strategııalyq baǵdarlamasynyń aıasynda aty atalǵan aıryqsha tulǵalarymyzdyń tarıhı ornyn jáne olardyń el damýyna, otandyq kósemsózdiń órkendeýine qosqan úlesin baıyptaý maqsatynda ótken alqaly basqosýǵa elimizdiń belgili ǵalymdary, qoǵam jáne memleket qaıratkerleri, alashordashylardyń urpaqtary jáne respýblıkalyq BAQ ókilderi qatysty. Eýrazııa ulttyq ýnıversıtetinde ótken respýblıkalyq ǵylymı-tájirıbelik konferentsııada EUÝ Jýrnalıstıka máselelerin zertteý ınstıtýtynyń dırektory, fılologııa ǵylymdarynyń doktory Namazaly Omashev «Memlekettik múdde jáne otandyq kósemsóz bastaýlary», S.Seıfýllın murajaıynyń dırektory, QR Memlekettik syılyǵynyń laýreaty Nesipbek Aıtuly «Sákentaný: keshe jáne búgin», QR UǴA korrespondent-múshesi, fılologııa ǵylymdarynyń doktory, professor Dıhan Qamzabekuly «20-jyldardaǵy kósemsózdegi Alash muratynyń kórinisi», fılologııa ǵylymdarynyń doktory, professor Serikqalı Baımenshe «Beıimbet Maılın kósemsóziniń belgisiz betteri», fılologııa ǵylymdarynyń doktory, professor Amantaı Shárip «Sultanbek Qojanuly jáne HH ǵasyr basyndaǵy qoǵamdyq-saıası kósemsóz», fılologııa ǵylymdarynyń doktory, professor Rahymjan Turysbek «Turar kósemsóziniń derektik-tanymdyq qyrlary», fılologııa ǵylymdarynyń doktory, aqyn Janat Áskerbekqyzy «Іlııas kósemsózindegi kórkemdik negizder», fılologııa ǵylymdarynyń doktory, professor Meńdigúl Shyńdalıeva «B.Maılın ocherkteri: zerde men zerektik», fılologııa ǵylymdarynyń kandıdaty, Bas redaktorlar klýbynyń vıtse-prezıdenti Muratbek Toqtaǵazın «Sábıt Dónentaev álemi: zertteý mindetteri» taqyryptarynda baıandama jasap, olardyń qaıratkerligi men shyǵarmashylyǵyna jan-jaqty taldaý jasady. Sharanyń resmı bóliminen keıingi ekinshi bólimde alash qaıratkerlerine arnap as berildi.

Konferentsııa bastalar aldynda oǵan qatysýshylar «Jastar» shaǵynaýdanynda Han Kene sarbazdary, ultymyzdyń birtýar perzenti Smaǵul Sádýaqasuly, basqa da alash ardaqtylary jerlengen babalar qorymynda bolyp, ult maqtanyshtary arýaqtaryna arnaıy quran baǵyshtady.

Konferentsııa materıaldary jeke jınaq bolyp jaryq kóretin bolady.