Ult densaýlyǵy jobasy sheńberinde Kókshetaýda kópbeıindi aýrýhana salynady

«Densaýlyq saqtaý salasyndaǵy barlyq memlekettik baǵdarlamalar ýaqtyly oryndaldy, Táýelsizdik jyldary Aqmola oblysynda 50-den astam densaýlyq saqtaý nysany salyndy, aýyldyq densaýlyq saqtaý salasynda 11 jyljymaly medıtsınalyq keshen bar, sondaı – aq, oblys óńirlerinde 11 kompıýterlik tomograf jáne 4 MRT apparaty jumys isteıdi. Qoldanystaǵy zańnamaǵa sáıkes 26 dárihana pýnkti emhanalar janynda jumys isteıdi, olarda búgingi kúni jalpy somasy 1.2 mıllıard teńgege 793 tegin dárilik preparattar bar. Jospar boıynsha jalpy somasy 8 mıllıard teńge bolatyn 900 ataýly dárilik preparat bolýy tıis», - deıdi Serik Sahıev.
Ortalyq dırektorynyń aıtýynsha, ómir súrý uzaqtyǵy ózgerdi. Densaýlyq saqtaý júıesi tarapynan únemi erekshe nazar aýdarylyp keledi. Soǵan qaramastan, oryndaýshylyq tártipke baılanysty turaqty olqylyqtar bar.
«Memleket Basshysy Qasym-Jomart Toqaev atap ótkendeı, bar salany qaıta qarap, basymdyqtardy belgileý qajet. Bul densaýlyq saqtaý salasyndaǵy bolashaq jobalarǵa da qatysty. Atap aıtqanda memlekettik jekemenshik áriptestik tetikterin paıdalana otyryp, 20 aýrýhana salý josparlanǵan. Árbir nysandy salýǵa arnalǵan shyǵystar onyń naqty qunynan birneshe ese asyp túsedi. Prezıdent taǵy da óziniń densaýlyq saqtaýǵa kóńil bóletinin atap ótti. Osyǵan baılanysty Densaýlyq saqtaý mınıstrligi men Indýstrııa jáne ınfraqurylymdyq damý mınıstrligi birlesip, ońtaıly qarjy modeli men shyǵystardy ońtaılandyrý turǵysynan alǵashqy segiz nysan boıynsha jumystar júrgizýde», - dep tolyqtyrdy Serik Sahıev.
Aıta ketsek, 2025 jylǵa deıin ult densaýlyǵy jobasyn júzege asyrý aıasynda Kókshetaý qalasynda kópbeıindi aýrýhana qurylysy júrgizilýde. Búgingi kúni Saryarqa yqshamaýdanynda jergilikti atqarýshy organ tarapynan 17 gektar jer telimi bólingen. Bul baǵyttaǵy jumystar odan ári jalǵasýda.