Ult densaýlyǵy jobasy: Kókshetaýda kópbeıindi aýrýhana salynady
Oblystyq densaýlyq saqtaý basqarmasynyń málimetinshe, óńirde densaýlyq saqtaý salasyndaǵy barlyq memlekettik baǵdarlamalar ýaqtyly oryndaldy. Táýelsizdik jyldary Aqmola oblysynda 50-den astam densaýlyq saqtaý nysany salyndy, aýyldarda 11 jyljymaly medıtsınalyq keshen bar, sondaı-aq oblys óńirlerinde 11 kompıýterlik tomograf jáne 4 MRT apparaty jumys isteıdi. Qoldanystaǵy zańnamaǵa sáıkes 26 dárihana pýnkti emhanalar janynda ashylǵan, olarda búgingi kúni jalpy somasy 1,2 mıllıard teńgege 793 tegin dárilik preparattar bar. Jospar boıynsha jalpy somasy 8 mıllıard teńge bolatyn 900 ataýly dárilik preparat bolýy tıis.
«Memleket basshysy Qasym-Jomart Toqaev atap ótkendeı, bar salany qaıta qarap, basymdyqtardy belgileý qajet. Bul densaýlyq saqtaý salasyndaǵy bolashaq jobalarǵa da qatysty. Atap aıtqanda, memlekettik-jekeshelik áriptestik tetikterin paıdalana otyryp, 20 kópbeıindi aýrýhana jáne 2 kópbeıindi ǵylymı-ınnovatsııalyq klınıka salý josparlanǵan. Árbir nysandy salýǵa arnalǵan shyǵystar onyń naqty qunynan birneshe ese asyp túsedi. Prezıdent taǵy da óziniń densaýlyq saqtaýǵa kóńil bóletinin atap ótti. Osyǵan baılanysty Densaýlyq saqtaý mınıstrligi men Indýstrııa jáne ınfraqurylymdyq damý mınıstrligi birlesip, ońtaıly qarjy modeli men shyǵystardy ońtaılandyrý turǵysynan alǵashqy segiz nysan boıynsha jumystar júrgizýde», - dedi vedomstvodan.
Basqarmanyń baspasóz qyzmetinen atap ótkendeı, bıyl Aqmola oblysynda densaýlyq saqtaý ǵımarattaryn kúrdeli jóndeý boıynsha 11 jobalaý-smetalyq qujattamany daıyndaýǵa 129,2 mıllıon teńge bólindi.
Sonymen birge, Tselınograd aýdanynyń Qoıandy aýylynda alǵashqy medıtsınalyq-sanıtarlyq kómek kórsetý ortalyǵynyń jáne Qosshy qalasynda 100 adam qabyldaıtyn emhananyń qurylysy jalǵasyp jatyr.
Atbasar aýdanynyń Novoselskoe aýylynda 170,1 mıllıon teńgege feldsherlik-akýsherlik pýnkt jáne Atbasar aýdanynyń Sochınskoe aýylynda medıtsınalyq pýnkt salýǵa «Shańyraq-XII» jaýapkershiligi shekteýli seriktestigimen kelisimshart jasaldy.
«Aýyldyq densaýlyq saqtaýdy jańǵyrtý» ulttyq ilki jobany iske asyrý sheńberinde 38 aýyldyq eldi mekende ambýlatorııalyq-emhanalyq uıymdar (3 medıtsınalyq pýnkt, 21 feldsherlik-akýsherlik pýnkt, 14 dárigerlik ambýlatorııa) salý josparlanýda.
Budan bólek, 2025 jylǵa deıin ult densaýlyǵy jobasyn júzege asyrý aıasynda Kókshetaý qalasynda kópbeıindi aýrýhana qurylysy júrgizilýde. Búgingi kúni Saryarqa yqshamaýdanynda jergilikti atqarýshy organ tarapynan 17 gektar jer telimi bólingen. Bul baǵyttaǵy jumystar odan ári jalǵasyp jatyr.
Aıta ketsek, budan buryn aqmolalyqtardy ońaltý sharalary qalaı júzege asyrylyp otyrǵanyn jazǵan edik.
