Ult densaýlyǵy - bizdiń sózsiz basymdyǵymyz bolyp qala beredi - Memleket basshysy
ASTANA. 4 shilde. QazAqparat - Ult densaýlyǵy - bizdiń sózsiz basymdyǵymyz bolyp qala beredi. Búgin elordada «Astana» prezıdenttik kásibı sport klýbynyń saltanatty tusaý keseri barysynda sóz sóılegen Memleket basshysy, atalmysh klýbtyń qurmetti Prezıdenti Nursultan Nazarbaev osylaı málimdedi.
«Bizdiń aldymyzda asa mańyzdy mindetter tur. Onyń ishinde biz buqaralyq sportty damytýǵa tıispiz. Ult densaýlyǵy - bizdiń sózsiz basymdyǵymyz bolyp qala beredi. Jalpy, sport degenniń ózi mádenıet dep aıtqan bolatynmyn. Ózine qarap, ózi úshin sportpen aınalyspaǵan adamdy mádenıetti deý de qıyndaý. Al memleket buqaralyq sport úshin bar jaǵdaıdy jasap jatyr. Búkil oblys ortalyqtarynda stadıondar salyndy, qalalarda alańdar ashylyp jatyr. Bul udaıy qaperde turatyn mańyzdy mindet, qarjy da qomaqty quıylýda», - dedi Memleket basshysy óz sózinde.
Bul rette Elbasy aldaǵy ýaqytta elordada jekpe-jek ortalyǵy men boks ortalyǵy mektebi salynatynyn, sporttyq oıyn túrleriniń kesheni boı kóteretinin atap ótti.
«Qazaqstandyq talanttardy júıeli túrde tartýdy esh esten shyǵarýǵa bolmaıdy. Jastar barynsha kóbirek sportpen qamtylýy tıis. Sol úshin bizge eń ozyq qana emes, eń qoljetimdi ınfraqurylymdardy damytý qajet. Bul da memleketpen atqarylyp jatyr. Jalpy, qazaqstandyq óskeleńdi sportqa barynsha baýlýdan, olardy shynyqtyryp, jattyqtyryp, jetistikterimen maqtanýdan asqan qýanysh joq. Sondyqtan da, buqaralyq sport bizge keleshek chempıondardy tabýǵa kóp septigin tıgizetin baza bola alady. Óskeleń sportqa qansha tartylǵan saıyn, biz de jastardy barynsha tanı túsemiz. Al jańa qanat qaǵyp otyrǵan «Astana» prezıdenttik kásibı klýby mundaı mıssııany zor senimmen atqara alady», - dedi N. Nazarbaev.
