Ult bolyp qalyptasýda eskertkishterdiń róli óte zor - saıasattanýshy B.Ábdiǵalıev
ALMATY. Sáýirdiń 14-i. QazAqparat / Ádilet Musahaev / - Almatyda Mádenı saıasat jáne ónertaný ınstıtýtynyń janynan ashylǵan «Taǵylym» atty mádenı-ıntellektýaldyq klýb «Tarıhı-mádenı mura jáne ulttyq sana» taqyrybynda otyrys ótkizdi,
dep habarlaıdy QazAqparat.
Qaraǵandy oblysy, Ulytaý aýdanynyń ákimi Berik Ábdiǵalıevtiń aıtýynsha, táýelsizdik alǵannan bergi ýaqytta ózin-ózi taný, buryn joǵalyp ketken ulttyq qundylyqtardy izdeý sııaqty qazaq ultynyń ult bolyp qalyptasý úrdisi júrip jatyr.
«Búgingi kúni saıası-tarıhı eskertkishterge mán bergen jón. Orys ımperııasy kezinde oǵan qarsy shyqqan batyrlardyń erligin eskertkishter arqyly nasıhattaýymyz kerek. Keńes ókimetin qurýǵa kúsh salǵandardyń barlyǵyna eskertkishter qoıylǵan, biraq Alash bozdaqtarynyń birine de osyndaı eskertkishter qoıylmaǵan. 19-20-shy ǵasyrda ult úshin qurban bolǵandarǵa eskertkish ornatý ult retinde qalyptasýda óte mańyzdy dep oılaımyn», deıdi B.Ábdiǵalıev.
Sondaı-aq ol Ulytaý aýdany sııaqty kıeli oryndardy mysalǵa ala otyryp áńgime qozǵap, tarıhı eskertkishterdi kóbinde tek arhıtektýralyq turǵyda qabyldap jatatyndyǵymyzdy sóz etti. Sonymen qatar ol Ulytaýda Joshy, Alasha hannyń eskertkishi, Edige bı men Toqtamystyń súıekteri bar ekenin jáne osylardyń súıegi nege Ulytaýda jatqandyǵyna jete mán bermeıtindigimizdi aıtady.
«Ulytaýda qazaqtyń úsh júziniń basy qosylǵan. Tańbaly tas degen jerde búkil qazaqtyń negizgi ókilderi tasqa tańba salǵan, ol osy kúnnen bastap biz qazaqpyz degendi bildiredi. Ol qazaqtyń birigýin, tutastyǵyn bildiretin, saıası odaqtyǵyn belgisi. Mine osy jerde eskertkish ornatsaq dep júrmiz», deıdi Berik Ábdiǵalıev.
