Úlkender balalar men jastardyń máselelerine kóbirek kóńil bólýleri tıis - Ilıa Ilın
ASTANA. 13 qyrkúıek. QazAqparat - Álemniń óńin ózgertý ár adamnyń óz qolynda. Eger shyn peıilińmen qalasań, aınalańdy, qorshaǵan ortańdy, tipti kúlli álemdi jalǵyz-aq qımylmen ózgertýge bolady.
Qıyn sátterde salymyzdy sýǵa jibermeý kerek. Ómirdiń árbir sátin qyzyqty qylyp ótkizýge bolady. Bizge Jaratýshy ıemiz Jer sharynda ómir súrý baqytyn buıyrtqan eken, sondyqtan biz sol ómirimizdi baǵalaı bilýimiz kerek.
Bul týraly Astana qalasyndaǵy Jastar densaýlyǵy ortalyǵyn tanystyrý kezinde jýrnalısterge bergen suhbatynda eki dúrkin Olımpıada chempıony Ilıa Ilın aıtty.
«Bizge, eresekterge balalar men jastardyń máselelerine kóbirek kóńil bólýimiz kerek. Biz olardy qorǵaýǵa mindettimiz», - dedi ol.
Aıta keteıik, Astanadaǵy Salaýatty ómir saltyn qalyptastyrý ortalyǵynyń qyzmeti aıasynda Jastar densaýlyǵy ortalyqtarynyń jumysy uıymdastyrylǵan bolatyn. Bul ortalyqtardyń negizgi mindeti jasóspirimderdiń densaýlyǵyn qorǵaý jolyndaǵy sharalardy atqarý jáne olardyń ortaǵa psıhologııalyq jáne áleýmettik beıimdelýine kómektesý. «Jetkinshek psıhologııasynyń ereksheligi - oǵan qajetti medıtsınalyq qyzmet túri dál qajetti kezinde, qoljetimdi ári qupııa túrde kórsetilýi kerek», - deıdi ortalyqtyń mamandary. Olardyń aıtýynsha, osyndaı qyzmetti atalmysh densaýlyq ortalyqtary minsiz atqara alady.
Búginde qalalyq emhanalardyń janynan osyndaı 9 Jastar ortalyǵy ashylǵan. Jaqyn arada taǵy bireýi iske qosylady dep josparlanyp otyr. Munda kez kelgen jasóspirim nemese 24 jasqa deıingi jastar ózine qajetti medıtsınalyq, psıhologııalyq kómek alý úshin osy ortalyqtardaǵy kásibı mamandarǵa júgine alady. Ortalyqtarda, sondaı-aq, senim telefondary bar.
«Basyńa túsken aýyrtpalyqtardy ishińde saqtaı bermeı, jaqyndaryńmen bólisý kerek. Dostar arasyndaǵy qarym-qatynas mańyzdy, degenmen balaǵa degen ata-ananyń yqylasynan artyq eshteńe joq. Al ata-analardyń ózi problema aldynda qaýqarsyz bolǵan jaǵdaıda, jasóspirimderge bilikti psıholog mamandary bar osyndaı ortalyqtar kómek kórsete alatyny qýantady», - dedi Olımpıada chempıony.
Salaýatty ómir saltyn qalyptastyrý jolynda qyrýar shara atqarǵan ortalyq óz jumysyn qoǵamǵa jetkizý jolynda jýrnalıster arasynda jastar densaýlyǵy ortalyqtarynyń jumysy jaıyndaǵy eń úzdik materıalǵa báıge jarııalaıdy. Saıysqa jeke avtorlar men avtorlyq ujymdardyń jumystary qabyldanady. Jumysty 2012 jyldyń 1 jeltoqsanyna deıin zozh-smi@mail.ru elektrondyq poshtasyna jiberý qajet. Qosymsha aqparatty www.zozh.kz saıtynan alýǵa bolady.
Bul bastamany «Altyn qyran» jáne «Baýyrjan» qaıyrymdylyq qorlary qoldap otyr. Sonymen qatar, Ilıa Ilın, Serik Sápıev, Aleksandr Vınokýrov syndy olımpıada chempıondary da jastar densaýlyq ortalyqtaryn ózderi aralap, jetkinshektermen kezdesip, olarǵa qoldaý kórsetýde.
«Elbasymyz Nursultan Nazarbaev ár sózinde salaýatty ómir saltyn ustanǵan jastar keleshekte elimizdi jańa jetistikterge jetkizetinin únemi aıtyp otyrady. Sondyqtan da, jastar, ini-qaryndastarym, senderge aıtarym, jaman ádetterden aýlaq bolyp, árdaıym salaýatty ómir saltyn ustanyńdar! Tek sonda ǵana ómirdegi óz oryndaryńdy tabasyńdar!» - dedi Ilıa Ilın.
