«Úlken jıyrmalyq» korporatsııalarǵa salynatyn biryńǵaı salyqty bekitti
RIM. QazAqparat – «Úlken jıyrmalyq» elderiniń úkimet basshylary men kóshbasshylary salyq salýdyń jalpy erejelerin kelisti. Rımdegi sammıtke qatysýshylar jobany qoldady, bul, atap aıtqanda, korporatsııalardyń kirisine eń az 15% jahandyq salyq engizýdi kózdeıdi. Vashıngton bul salyq jeńildikteriniń jarysyn toqtatýy kerek deıdi, dep habarlaıdy QaAqparat Euronews agenttigine silteme jasap.
Forýmnyń taǵy bir aýqymdy taqyryby - pandemııamen kúres boldy. Sammıttiń ashylýynda vaktsınany álemniń az qamtamasyz etilgen elderine kóbirek berýge úndeý jasaldy.
«Biz DDSU-nyń 2021 jyldyń sońyna qaraı álem halqynyń 40%-yn vaktsınalaý maqsatyna qol jetkizýge jaqyn qaldyq. Endi biz atalǵan kórsetkishti 2022jyldyń ortasyna qaraı 70%-ǵa jetkizý úshin qoldan kelgenniń bárin jasaýymyz kerek», - dedi Italııanyń premer-mınıstri Marıo Dragı.
Qytaı men Reseı basshylary Sı Tszınpın men Vladımır Pýtın beınebaılanys arqyly álemdik qaýymdastyqty COVID-19-ǵa qarsy túrli vaktsınalardy ózara tanýǵa kelisýge shaqyrdy.
Pýtınniń málimdemesi «Spýtnık V» preparatyn DDSU-da jáne Eýropalyq dárilik zattar agenttiginde tirkeý týraly máseleni uzaq qaraý aıasynda aıtyldy.
Aqparat agenttikteri klımat boıynsha kelissóz aıtarlyqtaı qıyn bolǵanyn atap ótti.
Qorytyndy qujatta, aldyn ala derekter boıynsha, Jerdegi ortasha jyldyq temperatýranyń 1,5 gradýstan artyq kóterilýine jol bermeý týraly jalpy usynystar bolady.
