Úlken jekpe-jekter áli alda – boksshy Jańabaev úsh tıtýl úshin ótken aıqasta jeńiske jetti

NUR-SULTAN. QazAqparat – Qazaqstandyq kásipqoı boksshy Nursultan Jańabaev úsh chempıondyq tıtýl úshin ótken aıqasta avstralııalyq qarsylasynan aılasyn asyrdy, dep habarlaıdy QazAqparat tilshisi.

Qazaqstan kásipqoı boksy federatsııasynyń vk.com jelisindegi paraqshasynan habarlanǵandaı,

Nursultan Jańabaev úshin bul aıqas segizinshi bolyp otyr.

«Nursultan Jańabaev Avstralııanyń Sıdneı qalasyndaǵy ICC Exhibition Centre arenasynda ótken boks keshine qatysty. Onyń qarsylasy retinde WBA Inter-Continental, WBO Oriental jáne IBF Pan Pacific tıtýldary úshin sharshy alańǵa jergilikti boksshy Stıv Gago kóterildi.

On raýndyq aıqas sońyna deıin jalǵasyp, tóreshilerdiń biraýyzdan qabyldaǵan sheshimi boıynsha (96-91, 95-92, 95-92 esebimen) qazaqstandyq jeńiske jetti», - delingen habarlamada.

Jańabaev úshin bul – segiz aıqastaǵy segizinshi jeńis (beseýin nokaýtpen aıaqtaǵan) ekenin aıta ketý kerek.

«Assalaýmaǵaleıkým baýyr aǵalar! Allaǵa shúkir, jeńiske jettik, tartysty jekpe-jek boldy! Súleımen kompanııasyna jáne qasymda qoldaý kórsetken aǵa baýyrlarǵa alǵysym sheksiz! Qudaı qalasa alda úlken jekpe-jekter kútip tur», - dep jazdy sportshynyń ózi Instagram paraqshasynda.

Eske sala ketsek, osy jyldyń naýryz aıynda Almaty Arena sport kesheninde ótken boks keshinde Nursultan Jańabaev WBA Intercontinental belbeýin jeńip alǵan bolatyn.