Úlkeni – ıÝnýs, kishisi – Záfıra: Qytaıda ómirge besem keldi

ASTANA. KAZINFORM – 26 aqpanǵa qaraǵan túni Qytaıdyń Ýhan qalasyndaǵy perzenthanalardyń birinde 24 jastaǵy Dılhýmar Mámetjan ómirge besem ákeldi.

Dárigerlerdiń aıtýynsha, tabıǵı jolmen besem tabý yqtımaldyǵy jer júzinde 60 mıllıon adamnyń birine ǵana buıyrady eken. Qytaılyq BAQ bul oqıǵany óte sırek kezdesetin medıtsınalyq muǵjıza retinde jarysa habarlap jatyr.

Qytaılyq Dasıan aqparattyq portalynyń  jazýynsha, kesar otasyn Qytaıǵa tanymal akýsher-gınekolog, Ýhan ýnıversıtetine qarasty Chjýnnan aýrýhanasynyń mamany Lı Tszıafý júrgizgen.

Onyń sózinshe, birden bes bala tabý óte sırek qubylys ári qaýip-qateri de kóp. Alǵashqy tekserý kezinde ana men týashaqtardyń qaýipsizdigin eskere otyryp, mamandar qursaqtaǵy sábıdiń sanyn azaıtý týraly usynys jasaǵan. Alaıda jas jubaılar bul usynyspen kelispegen. Bolashaq ananyń tańdaýyna qurmet etken dárigerler ony der kezinde jan-jaqty tekserýden ótkizip, bosandyrýǵa muqııat daıyndyq jasaǵan.

Dılhýmar Shyńjań uıǵyr avtonomııalyq regıony Hotan ýálaıatynyń Qaraqash aýdanynyń turǵyny, ulty uıǵyr. Óziniń birden bes balaǵa júkti ekenin bilgennen keıin, jergilikti medıtsınalyq mekemelerdiń biliktiligi shekti ekenin eskergen Dılhýmar myńdaǵan shaqyrym jol basyp, Ýhan qalasyndaǵy mamandandyrylǵan aýrýhananyń kómegine júgingen.

25 aqpan kúni keshke qaraı Dılhýmardyń qaǵanaǵy merziminen erte jarylyp, jedel medıtsınalyq járdem kórsetýge týra keledi.

Qytaılyq BAQ-tyń jazýynsha, aınalasy 15 mınýt ishinde akýsher, neonatolog, anestezıolog mamandar tas-túıin daıyndalyp, tolyq quramda jumysqa kirisken. Ota barysynda bes sábı kezek-kezegimen aman-esen dúnıege kelgen.

Sábılerdiń salmaǵy retimen 990, 1020, 970, 1030 jáne 870 gramm. Alǵashqy medıtsınalyq baǵalaý kórsetkishi 6 baldan joǵary bolǵan.

-Qyryq jylǵa jýyq eńbek jolymda mundaı jaǵdaıǵa alǵash ret tap bolyp otyrmyn, – deıdi Lı Tszıafý.

Onyń aıtýynsha, Qazirgi tańda nárestelerdiń ómirlik kórsetkishteri salystyrmaly túrde turaqty. Degenmen olardy alda erkin tynystaý, kóldeneń dertten qorǵaný, durys qorektený sekildi birneshe kúrdeli synaq kútip tur. Qazirgi kúnde ádettegi palataǵa aýystyrylǵan sábılerdiń ósýi men damýyn mamandar jiti baqylaýda ustap otyr.

Birden bes balanyń ákesi atanǵan Abdýlla Ahattyń aıtýynsha, erli-zaıyptylar aqyldasa kele sábılerdiń tuńǵyshyna ıÝnýs, ekinshisine Mıhrııa, úshinshisine Mıhrıma, tórtinshisine Zámırá, kenjesine Záfıfe dep at qoıǵan.

Buǵan deıin Qytaıdyń Iranmen zymyran kelisimi týraly sheteldik BAQ aqparattaryn joqqa shyǵarǵanyn jazǵan edik.