Zor úmit: Sheteldik BAQ Prezıdenttiń Qatarǵa saparyn talqylap jatyr
Prezıdent Qasym-Jomart Toqaevtyń Qatarǵa memlekettik saparyna halyqaralyq BAQ erekshe nazar aýdardy. Sheteldik basylymdar Qazaqstan men Qatar arasyndaǵy qarym-qatynastyń nyǵaıýy týraly ne jazdy? Bul týraly Kazinform tilshisiniń sholýynan oqyńyz.
Zor úmit, kemel keleshek – halyqaralyq BAQ Memleket basshysynyń Qatarǵa sapary jaıly
Bul Qazaqstan Prezıdentiniń bul elge alǵashqy memlekettik sapary.
Qatardyń Doha News aqparat agenttigi Qazaqstan men Qatar zań, jumyspen qamtý, aqparattyq tehnologııalar, áleýmettik damý, jastar bastamalary, adaldyq, bank isi, telekommýnıkatsııa, energetıka sııaqty ártúrli sektorlarda jáne ınfraqurylymdyq jobalarda kóptegen kelisimmen qarym-qatynasyn «bekitip» jatqanyn jazdy.
Kelisimderdiń arasynda eki el basshylary sot yntymaqtastyǵy úshin jańa pretsedent bolatyn qylmystyq ister boıynsha ózara quqyqtyq kómek týraly mańyzdy paketke qol qoıylǵanyn atap ótti, – dep habarlady Doha News.
Basylymnyń málimetinshe, Qatar banki Lesha Bank men qazaqstandyq «Báıterek» venchýrlyq qory arasyndaǵy kelisimge, sondaı-aq Mobile Telecom Service kompanııasymen strategııalyq kelisimge qol qoıylǵannan keıin ekonomıka jáne tehnologııalyq sektorlar aıtarlyqtaı serpin alady.
Energetıka jáne ınfraqurylymdyq jobalar da nazarda boldy. Atap aıtqanda, energetıkany damytýǵa baǵyttalǵan birneshe jobany qamtıtyn ózara túsinistik týraly memorandýmǵa qol qoıyldy, onyń ishinde Qashaǵan ken ornynda elektr stantsııasy men gaz óńdeý zaýytynyń qurylysy bar.
Sondaı-aq, Qatar men Qazaqstan arasyndaǵy sınergetıkalyq damýdyń mańyzdylyǵy men áleýetin arttyryp otyrǵan sektor – baılanys jáne aqparattyq tehnologııalar salasyndaǵy yntymaqtastyq týraly ózara túsinistik týraly memorandým bekitildi.
Jastar saıasaty salasyndaǵy yntymaqtastyqtyń 2024-2026 jyldarǵa arnalǵan birinshi atqarýshy baǵdarlamasynyń bastamasy aıtýly oqıǵa boldy. Bul baǵdarlama eki eldiń óskeleń urpaqtaryna paıdaly ıdeıalar men bastamalardyń belsendi almasýyna yqpal etýge baǵyttalǵan, – dep jazdy Doha News.
Qatar news agency Qazaqstan Prezıdenti Qatardyń órkendep kele jatqan ekonomıkasy men beıbitshilikke baǵyttalǵan syrtqy saıasatyn joǵary baǵalaǵanyn atap ótti.
Búginde Qatar – ozyq jáne qarqyndy damyp kele jatqan ekonomıkasymen, sondaı-aq belsendi ári beıbit syrtqy saıasatymen tanymal. Joǵary Mártebeli sheıh Támım ben Hamad Ál Tánıdiń basshylyǵymen sizderdiń elińiz úlken jetistikterge jetti. Qatar óziniń qýatty ekonomıkasyn jáne órkendegen qoǵamyn maqtan tutýyna bolady, – dep keltiredi basylym Qasym-Jomart Toqaevtyń Qatar Memleketiniń Konsýltatıvtik keńesinde (Ál-Shýra Konsýltatıvtik Májilisi) sóılegen:sózin.
Aqparat agenttiginiń habarlaýynsha, Memleket basshysy «aýqymdy reformalarǵa asa mańyzdy zańnamalyq qoldaý kórsetip, negizgi ishki protsesterdi qadaǵalap otyratyn» Shýra Keńesiniń damý jáne jańǵyrtý úderisindegi rólin joǵary baǵalap, elimizdiń «sot tóreligi, zań ústemdigi, teńdik jáne jaýapkershilik qaǵıdattaryna negizdelgen «Ádiletti Qazaqstandy» qurý jolynda kúsh-jiger jumsap jatqanyn» atap ótti.
Sonymen qatar, The Times of Central Asia Qazaqstan Prezıdenti Qatar parlamentiniń kvorýmynda sóz sóılegen alǵashqy sheteldik kóshbasshy bolǵanyna nazar aýdardy.
Aqparat agenttiginiń málimetinshe, memlekettik deńgeıdegi kelissózderden keıin Qasym-Jomart Toqaev elder arasynda tolyqqandy strategııalyq áriptestik ornatýdy usynǵan. Sonymen qatar, Qazaqstan basshysy 2025 jyly Parsy shyǵanaǵy men Ortalyq Azııany baılanystyratyn ıntermodaldyq kólik jelisin damytý, sondaı-aq aýyl sharýashylyǵy salasyndaǵy yntymaqtastyqty keńeıtý jáne bir-biriniń astanalarynda Qazaqstan men Qatardyń mádenı kórmelerin uıymdastyrý qajet ekenin atap ótti.
Kelissózder barysynda Toqaev 250 mıllıon dollarǵa 60 shıkizat emes taýardyń Qatarǵa eksportyn ulǵaıtýǵa daıyn ekenin aıtty, sondaı-aq ekijaqty taýar aınalymyn 500 mıllıon dollarǵa deıin arttyrýdy usyndy, – dep jazady The Times of Central Asia.
Agenttiktiń habarlaýynsha, Qazaqstan tarapy men Qatar Ámiri Támım ben Hamad ál-Tánı arasyndaǵy kelissózderdiń qorytyndysy boıynsha on shaqty qujatqa qol qoıylǵan. Sonymen birge, negizgi kelisim «QazaqGaz» memlekettik kompanııasy» AQ men Qatar UCC Holdıngi arasyndaǵy Qazaqstannyń Qashaǵan ken ornynda gaz óńdeý zaýyttaryn salýdaǵy yntymaqtastyqqa, sondaı-aq energetıka jáne gaz salasyndaǵy, sondaı-aq «Samuryq-Qazyna» AQ men QR Energetıka mınıstrligi jáne Qatar Energy International Holding arasyndaǵy jobalarǵa baǵyttalǵan.
Qatar news agency málimetinshe, Qazaqstan Respýblıkasynyń Qatar Memleketindegi elshisi Arman Isaǵalıev Memleket basshysy Qasym-Jomart Toqaevtyń Dohaǵa sapary eki el arasyndaǵy keń seriktestikti damytýǵa jáne ekijaqty qarym-qatynasty nyǵaıtýǵa umtylysyn aıǵaqtaıtynyn atap ótti.
Qatar aqparat agenttigimen (QNA) suhbatynda elshi sapardyń kún tártibinde BUU, Islam yntymaqtastyǵy uıymy jáne Azııadaǵy ózara is-qımyl jáne senim sharalary keńesi sııaqty halyqaralyq uıymdardaǵy yntymaqtastyq máselelerin talqylaý bolatynyn aıtty. Bul saparda Islam Azyq-túlik qaýipsizdigi uıymy aıasyndaǵy azyq-túlik qaýipsizdigine de úlken mán beriledi, dep jazady basylym.
Redaktsııanyń habarlaýynsha, dıplomat Qazaqstan Respýblıkasy Prezıdentiniń Qatarǵa alǵashqy memlekettik saparyn ekijaqty yntymaqtastyqty múlde jańa deńgeıge kóteretin tarıhı oqıǵa dep sanaıdy.
Eske salaıyq, Memleket basshysy Qasym-Jomart Toqaev aqpannyń 13-14-inde Qatarǵa memlekettik saparmen bardy. Sarapshylar Qazaqstan Prezıdentiniń saparynyń negizgi maqsaty ınvestıtsııa jáne ekijaqty qarym-qatynasty jańa deńgeıge kóterý dep baǵalaǵan. Bul týraly tolyǵyraq myna jerden oqı alasyz.
Sondaı-aq, Kazinform tilshisi Prezıdent saparynyń qorytyndysyna sholý jasap, basty kelissózder men kezdesýlerge toqtaldy.
