«Úlken opera» baıqaýynyń jeńimpazy S. Ahmetova Astanaǵa oraldy
ASTANA. QazAqparat - Otandyq opera ánshisi «Úlken opera» baıqaýy 3 maýsymynyń jeńimpazy Saltanat Ahmetova Astanaǵa oraldy. Áýejaıda Saltanatty týǵan-týystary, joldastary qarsy aldy, dep habarlaıdy 24.kz.
Saltanat jeńisine sheksiz qýanyshty. Birneshe elden kelgen kásibı ártisterdiń arasynan top jaryp shyǵý ánshi úshin úlken jetistik boldy. Aıta ketsek, Saltanat Ahmetova Kókshetaýdaǵy Birjan sal atyndaǵy mýzyka kolledjiniń «án salý» bólimin jáne Qazaq ulttyq mýzyka akademııasyn «jeke án salý» mamandyǵy boıynsha bitirgen. Kezinde ánshi Italııadaǵy vokal óneri akademııasynda biliktiligin arttyrǵan. 2013 jyldan beri «Astana Opera» teatrynda jumys istep júr. Buǵan deıin Saltanat birqatar bedeldi halyqaralyq baıqaýlarǵa qatysyp, jeńimpaz atanǵan bolatyn.
«Bul baıqaýdyń qatysýshylary bir-birin básekeles retinde qarastyrǵan joq. Bárimiz dostasyp kettik. Men jeńgenime óte qýanyshtymyn. Aldaǵy ýaqytta odan da kóp jumys isteımin. Maǵan qazirdiń ózinde jaqsy usynystar túsip jatyr», - deıdi «Úlken opera» baıqaýynyń jeńimpazy.
