Úlken qalalarda elektromobıldi kóptep júrgizý kerek - Nursultan Nazarbaev

ASTANA. QazAqparat - QR Prezıdenti Nursultan Nazarbaev aýanyń lastanýyna qatysty pikir bildirdi. Osy oraıda Memleket basshysy úlken qalalardyń ekologııasyn jaqsartý úshin elektromobılderdi kóptep júrgizý qajettigin jetkizdi, dep xabarlaıdy QazAqparat tilshisi.

Prezıdenttiń aıtýynsha, Almaty sııaqty úlken qalalarda kólik quraldary aýany qatty lastaıdy. Búginde osy máselege erekshe kóńil bólinip keledi. «Osyǵan baılanysty respýblıka boıynsha 3 040 jańa qoǵamdyq kólik qurastyryldy. Sonyń jartysy gazben júredi. Jaqynda men Qostanaıda boldym. Ol jaqta biz otandyq elektromobılderdi qurastyra bastadyq. Mine, dál osy kóliktermen aýasy lastanyp jatqan qalalardy qamtamasyz etý kerek. Birinshiden, ol - Almaty. Sebebi ol jerde xalyq ta, kólik te kóp», - dedi N.Nazarbaev otandyq BAQ ókilderine bergen suxbatynda.

Memleket basshysynyń sózine qaraǵanda, 1998 jylǵa deıin Qazaqstanda 700 myń kólik bolǵan. Qazir avtomobıl minetin qazaqstandyqtardyń sany 5 mln-ǵa jetti. «Osy kólikter qorshaǵan ortany lastap jatyr. Sol sebepti metro, jeńil relsti kólik qatynasy, qoǵamdyq kólikter, benzınge qoıylatyn talaptar jáne taǵysyn taǵy - bunyń barlyǵy ekologııany saqtaý jolyndaǵy sharalar», - dep atap kórsetti N.Nazarbaev.

Aıta keteıik, óz suxbatynda Memleket basshysy bıýdjet aqshasyn bankterge ne úshin berilip jatqanyn da túsindirdi. Budan bólek, «EKSPO-ǵa jumsalǵan aqsha aqtala ma?» degen suraqqa jaýap berdi. Nursultan Nazarbaev qaltaly azamattardy oralmandarǵa kómek berýge úndedi.