«Úlken Eýrazııa» mega-jobasy zertteýdi qajet etedi - Prezıdent

BІShKEK. QazAqparat – «Úlken Eýrazııa» mega-jobasy jan-jaqty zertteýdi qajet etedi. Bul týraly Eýrazııalyq ekonomıkalyq forýmynyń jalpy otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Vladımır Vladımırovıch Pýtın (Reseı Federatsııasynyń Prezıdenti – avt.) óte qyzyq usynysty aıtyp, ony tıisti túrde tujyrymdap ótti. Bul turǵyda «Úlken Eýrazııa» mega-jobasy eskerilip otyr. Shyn máninde, bul joba tyńǵylyqty zertteý men talqylaýǵa laıyq bolyp tur», - dedi Qasym-Jomart Toqaev.

Osy oraıda Prezıdent aldaǵy ýaqytta bul usynysty júzege asyrýǵa qatysty talqylaý bolýy múmkin ekenin aıtty.

«Sonymen qatar Reseı Prezıdenti tarapynan ıntegratsııa protsesine basqa da múddeli elderdi qosý týraly oryndy usynysy aıtyldy. Bul rette Qytaıdyń «Bir beldeý – bir jol» jobasy týraly, sondaı-aq Eýrazııa keńistigindegi ıntegratsııa protsesterine qosylýǵa qyzyǵýshylyq tanytqan basqa elderdi de aıta alamyz», - dedi Memleket basshysy.

Munymen qosa Qazaqstan Prezıdenti qarjylyq máselelerge de toqtalyp ótti.

«Qarjylyq ózara qarym-qatynystarǵa baılanysty kúrdeli máselege qatysty toqtalsaq, bul taqyryp boıynsha jaqynda Vladımır Vladımırovıch Pýtınmen tyńǵylyqty kelissózder boldy. Osy oraıda tıisti ýaǵdastyqtarǵa kelip, Qazaqstan Úkimeti tarapynan qajet sharalar qabyldandy. Sondyqtan bul baǵyta problema joq dep sanaımyn. Bul jaǵdaıda bir-birimen jaqyn ornalasqan Reseı men Qazaqstan sııaqty memleketter tıisti sheshimderdi taba alady jáne aldaǵy ýaqytta da laıyqty sheshimdi jasaýy kerek», - dedi Qasym-Jomart Toqaev.

Buǵan deıin habarlaǵanymyzdaı, Qasym-Jomart Toqaev resmı saparmen Qyrǵyzstanǵa bardy.

Qyrǵyzstan Prezıdenti «Aq keme» mármár shatyrynda Qasym-Jomart Toqaevty resmı qarsy aldy.

Qazaqstan Prezıdentiniń Qyrǵyzstanǵa sapary barysynda birqatar qujatqa qol qoıyldy.