Úlken ekrannyń kishkentaı juldyzy - Rıza Danııar
ASTANA. QazAqparat - Balalar televıdenıesi jas jetkinshekterge telebaǵdarlamalardy júrgizip, óz darynyn synap, akter retinde ekranǵa shyǵyp, fılmniń túsirilimindegi jaı-kúıdi sezinip kórý múmkindigin usynady. Balalarymyzdyń baǵyna qaraı, bizdiń elimizde jas órender úshin osynaý biregeı múmkindik Balapan arnasynda berilip otyr. Búginge deıin arna teleekrannyń birshama juldyzdaryn tárbıelep shyǵardy. Osy rette kóp juldyzdyń birine aınalǵan Rıza Danııar týraly sizderge áńgimelep berýdi jón kórip otyrmyz.
Biri qyzyǵy, Rıza bar bolǵany 9 jasynda televıdenıege kelgen. Al qazir onyń jasy 14-te. Bala bolsa da, bes jyldyq eńbek ótili jas órendi aıtarlyqtaı shyńdaǵan eken. Qazirgi ýaqytta ony kósheden baıtanys balalar men onyń áke-shesheleri tanyp qoıatyn kórinedi. Bala bolsa da, jumysyna barynsha zor jaýapkershilikpen qaraıtyn Rıza árqashan kez kelgen taqyrypqa shyǵarmashylyq turǵyda kirisedi.
«Meniń eń birinshi telebaǵdarlamam «Biz baqytty balamyz» dep atalǵan bolatyn. Áý basta meni kastıngke shaqyrdy. Alǵashynda ótpeı qalsam da, óz-ózimdi muqatpaı tyńǵylyqty túrde daıyndala bastadym. Ekinshi rette baıqaýdan osylaısha ótip kettim. Odan keıin daıarlyq jumysy júrgizildi de, meni efırge daıarlaı bastady. Álbette, alǵashynda qorqynyshym basym bolǵan edi. Biraq, 7 kúndik tynymsyz ázirlik pen mamandardyń táliminen keıin óz-ózime degen senimim nyǵaıa tústi», - deıdi Rıza.
Búgingi tańda Rıza - balalar arnasynyń eń tájirıbeli júrgizýshileriniń biri.
«Men eń alǵashqy efırimdi Baq-baq atty keıipkermen birge júrgizdim. Ol sóıleı alatyn qýyrshaq edi. Árıne, qatelikterdi ózim de baıqaıtyn edim. Biraq, kelesi efırge deıin osy olqylyqtardyń ornyn túzeýge tyrysyp baqtym», - deıdi Rıza.
Bes jyldyq eńbek barysynda qyzyq jaǵdaılar da kezdesken kórinedi.
«Bizdiń redaktorlar bizdi sózben qoldap turý úshin qulaǵymyzǵa qulaqqap kıgizedi. Keıde sol qulaqqaptar túsip qalatyn kezder de bolady. Tipti bir kúni men efırdiń bastalyp ketkenin baıqamaı qalyp, kórermenderim sózimdi estip qoıdy. Biraq, oǵan uıalyp qalmaı, jumysymdy jalǵastyra berdim», - deıdi ol.
Rıza qazirden bastap ártis nemese tilshi bolýdy armandaıdy eken. Telekanaldyń bas redaktory Aıgerim Balǵabaıdyń aıtýyna qaraǵanda, Rıza teńdesi joq kadr, sózsiz eń myqty júrgizýshilerdiń biri bolyp tabylady.
«Bizdiń otbasymyzda tilshi joq. Anam psıholog bolsa, ákem «Astana Sý arnasy» mekemesinde eńbek etedi. Telebaǵdarlamalardy júrgizý unaıtyndyqtan, televıdenıege ózim bardym», - deıdi oqýshy.
Abyroı-ataqty kóterý bala túgili, eresekterdiń ózine de ońaı emes. «Juldyzdy aýrý» degen túsinikke qalaı qaraısyń degen suraqqa Rıza kúlimdep qana jaýap berdi.
«Álbette, odan aýlaqpyn. Meni mektepte bári biledi. Keıde «balapan» dep te ataıdy. Biraq, onyń bárine áldeqashan boıym úırenip ketken. Ózimdi eshkimnen artyq sanamaımyn», - deıdi ol.
Oqý men televıdenıeden bólek, Rıza dombyra úırený úıirmesine, túrik tiliniń kýrsy men voleıbol úıirmesine barady eken.
«Áý basta men oǵan kóp aqyl aıtatynmyn. Sebebi, kásiptiń qyr-syryn meńgerý kerek bolatyn. Búkilálemdik Balalardy qorǵaý kúni «Qazaqstan» Ulttyq arnasynda belgili júrgizýshi Lambrıan Topýzıdıspen birge Rıza jańalyqtar baǵdarlamasyn júrgizdi. Ol óte eńbekqor», - deıdi Aıgerim Balǵabaı.
Onyń aıtýynsha, telearnadan osy ýaqytqa deıin aıtarlyqtaı kóp júrgizýshiler túlep ushqan.
«Biz ózimiz tálim bergen balalardyń ketkennen keıingi ómirin baqylap júremiz. 7 jyldyq jumys barysynda birshama júrgizýshilerimiz ósip, jetilip, keıbiri tilshilik ómirdi tańdasa, keıbiri tabysty túrde bizdiń respýblıkalyq arnalarda eńbek etip júr. Bári de bizdiń arnadaǵy tájirıbe olarǵa zor kómek bolǵanyn aıtyp júredi», - deıdi Aıgerim Balǵabaı.
