Ulttyq qordaǵy 370 dollardy bolashaqtaǵy baspanaǵa qalaı aınaldyrýǵa bolady?

Búginde Qazaqstannyń árbir balasynda buryn-sońdy bolmaǵan múmkindikter bar. Ol - Ulttyq qordan túsetin qarajat. Balaǵa beriletin bul qarajat ýaqyt óte kele birneshe mıllıon teńgege deıin ósip, onyń bilim alýyna nemese jeke baspanasyn satyp alýyna jumsalýy múmkin. Ata-analar úshin basty artyqshylyǵy – jınaqty nólden bastaýdyń qajeti joq. Sebebi alǵashqy qadamdy memleket jasap qoıdy.

Alǵashqy kapıtal qazirdiń ózinde bar

2024 jyldan bastap Qazaqstannyń árbir balasyna Ulttyq qordan ınvestıtsııalyq tabystyń bir bóligi aýdarylady. Baǵdarlamaǵa úsh jyl qatarynan qatysyp kele jatqan balalardyń shotynda qazirdiń ózinde 370,56 AQSh dollary jınaqtaldy. 18 jasqa tolǵan qazaqstandyqtar bul qarajatty birden paıdalana alady. Ony turǵyn úı jaǵdaıyn jaqsartýǵa nemese bilim alýǵa tóleýge jumsaýǵa bolady.

Jınaq somasy ázirge salystyrmaly túrde az. Sondyqtan qazaqstandyqtardyń basym bóligi bul qarajatty bastapqy kapıtal retinde paıdalanyp, ári qaraı jınaqtaryn jalǵastyryp, «Otbasy bankindegi» depozıtterin tolyqtyrady. Muny qazirdiń ózinde 198 949 jasóspirim jasady. Úsh jyl ishinde olar Ulttyq qordan túsken 19,5 mlrd teńgeni jınaq shottaryna baǵyttaǵan.

Olardyń barlyǵy qarjylyq saýattylyqtyń negizgi qaǵıdatyn jaqsy túsinedi: aqsha qozǵalysta bolýy kerek. Óıtkeni kámeletke tolǵannan keıin qarajat BJZQ-daǵy nysanaly shotta qala berse, oǵan qosymsha tabys eseptelmeıdi. Al eger aqsha 10 jyl ishinde paıdalanylmasa, ol shot ıesiniń zeınetaqy shotyna aýdarylady.

Ulttyq qordan túsken qarajatty «Otbasy bankine» salý arqyly aldaǵy ýaqytta baspana alǵysy keletin jandardyń biri – Aqtóbe oblysynyń Muǵaljar aýdanyna qarasty Embi qalasynyń turǵyny Aqbota Qonysbaeva. Búginde ol Q.Jubanov atyndaǵy Aqtóbe óńirlik ýnıversıtetinde fızıka pániniń muǵalimi mamandyǵy boıynsha bilim alyp jatyr.

- «Ulttyq qor – balalarǵa» baǵdarlamasy elimizdiń bolashaǵy sanalatyn jas urpaqqa jasalǵan úlken múmkindik dep oılaımyn. Bul qarajatty jaı ǵana beriletin qarjy retinde emes, bolashaqqa jasalǵan mańyzdy qadam retinde qabyldadym. 18 jasqa tolǵan soń, men bul qarajatty «Otbasy bankindegi» jınaq shotyma salýdy sheshtim. Sebebi, qazirgi tańda men úshin eń úlken maqsattardyń biri – bolashaqta óz baspanama qol jetkizý. Meniń oıymsha, bul qarajatty durys josparlap, uzaq merzimdi maqsatqa baǵyttaý – ár jas úshin mańyzdy. Búgingi tańda salynǵan árbir teńge erteńgi kúnge degen senimniń irgetasyn qalaıdy. Qazirgi tańda sol qarajatty bolashaq baspanama arnalǵan jınaǵymnyń alǵashqy qadamy retinde qabyldap otyrmyn, - dedi bolashaq ustaz.

Aqbota Ulttyq qordan túsken qarajattyń Otbasy bankindegi jınaǵyn kóbeıtýge kómektesetinin jaqsy biledi.

Mine, bul bylaı jumys isteıdi:

- jınaqqa banktiń 2% mólsherindegi syıaqysy jáne 200 AEK-ten aspaıtyn somaǵa 20% mólsherinde memlekettik syılyqaqy esepteledi. Memlekettik syılyqaqyny eskergende, depozıt boıynsha JTSM 14%-ǵa deıin jetedi;

- qarajatty turaqty túrde jınaqtaý arqyly jyldyq 3,5%-dan 8,5%-ǵa deıingi mólsherlememen turǵyn úı zaemyn alýǵa bolady;

- bastapqy jarnasy men mólsherlemesi tómendetilgen turǵyn úı baǵdarlamalaryna, onyń ishinde «Naýryz» baǵdarlamasyna qatysý múmkindigi artady;

- depozıtti turaqty tolyqtyryp otyrý tabysty rastaýsyz turǵyn úı zaemyn alýǵa múmkindik beredi.

Búginde Ulttyq qordan túsken qarajatty Otbasy bank mobıldi qosymshasy arqyly birneshe qadammen alýǵa múmkindik bar.

Taldyqorǵan qalasyndaǵy Avıtsenna atyndaǵy medıtsına kolledjiniń stýdenti Aqerke Qusman Otbasy bankindegi jınaq depozıtiniń múmkindikterin jaqsy biledi. Sol sebepti ol Ulttyq qordan túsken qarajatyn Otbasy bankindegi jınaq shotyna aýdaryp, bolashaqta baspana alýǵa qajetti qarajatyn jınaqtap jatyr.

- Týǵan jerim – Jetisý oblysy Aqsý aýdanyna qarasty Jansúgirov aýyly. Jazǵy demalystan oqýǵa kelgen kezde qaladan jaldamaly páter izdep únemi sarsańǵa túsetinmin. Sodan keıin ıpoteka arqyly páter alý múmkindikterin qarastyryp, túrli bankterdiń resmı saıttarynan aqparat izdedim. Osydan bes aı buryn Ulttyq qordan meniń BJZQ-daǵy shotyma túsip jatqan qarajatty Otbasy bankindegi depozıtke aýdarýǵa bolatynyn bildim. Osy múmkindikti paıdalaný úshin qalamyzdaǵy bank bólimsheleriniń birine bardym. Bank mamandary maǵan depozıttiń barlyq sharttaryn túsindirip berdi. Sharttar kóńilimnen shyqqan soń, Ulttyq qordan túsken qarajatymdy Otbasy bankindegi jınaq shotyma aýdardym. Endi qolyma artyq qarajat túsken kezde birden shotyma aýdaryp qoıyp júrmin. Jınaqtalatyn qarajatqa baspana alǵym keledi, - dedi bolashaq medıtsına qyzmetkeri.

* 3,5% – JTSM 3,6%-dan 4,4%-ǵa deıin, 8,5% – JTSM 9%-dan 9,6%-ǵa deıin.