Úlken aýylyndaǵy AES qurylysy: Turǵyndar ne deıdi
Talqylaýǵa jergilikti turǵyndar, jýrnalıster, qoǵamdyq keńes músheleri, depýtattar, Almaty oblysy ákimdiginiń, Energetıka mınıstrliginiń qyzmetkerleri, ekologııa, seısmıka, qaýipsizdik, energetıka, ınfraqurylym salalarynyń sarapshylary, belsendiler qatysty. Úlken aýyl mektebiniń úlken zalynda ótken is-shara barysynda AES qurylysyn jaqtaýshylar da, oǵan qarsylyq tanytqandar da boldy.
Degenmen, Úlken aýylynyń turǵyndary óńirde atom energetıkasyn damytýdy qoldap otyr. Olar atom elektr stansasynyń óńirdiń áleýmettik-ekonomıkalyq damýy úshin úlken máni bar ekendigin aıtady. Solardyń biri Dıana Tretıkova Úlken aýylynda 1986 jyldan beri turyp keledi.
«20 jyldan astam ýaqyttan beri Úlken aýylynda sýmen jabdyqtaýmen jáne sý burýmen aınalysyp kelemin. Árıne, AES qurylysyn tolyqtaı qoldaımyn. Biz alǵa qaraı ilgerileýimiz qajet. AES-tiń osy jerde ne bolmasa basqa óńirde salynǵany mańyzdy emes. Eń bastysy Qazaqstanda katom stansasynyń bolýy. Óndiris damýy tıis. Bizde elektr energııasynyń tapshylyǵy baıqalady. Osy jyldyń ózinde ony baıqadyq. Qazaqstannyń bolýy qajet. Biz Eýropanyń damyǵan elderimen qatar damýymyz kerek dep esepteımin», - dedi aýyl turǵyny.
Aýyldyń taǵy bir turǵyny da atom elektr stansasynyń salynǵanyn qoldaıdy.
«AES bizge qajet. Eger elektr energııasynsyz qalsaq qalaı ómir súrmekpiz. Onyń ústine AES jańa jumys oryndaryn ashady. Sondyqtan da men qoldaımyn. Menińshe, AES qazaqstandyqtardyń ómirin jaqsy jaqqa qaraı ózgertedi. Ózge elderde de AES bar, adamdar turyp jatyr. Bári jaqsy, bizde de bári jaqsy bolady. Bolashaqta onda balalarymyz, nemelerimiz jumys isteıdi. Olardy da oılaýǵa tıispiz», - dedi ol.
Úlken aýylynda 40 jyldan beri turatyn Rahıma Qaıyrbekova da Qazaqstannyń bolashaǵy úshin AES qajet ekendigin aıtady.
«Biz bir-birimizge qulaq asýymyz qajet. Aýyl turǵyndary AES qurylysyn qoldaımyz. Ol tek bizdiń aýylymyz úshin ǵana emes búkil elimiz úshin kerek. Qazaqstannyń bolashaǵyna senemin. Sarapshylardyń, atomshylardyń sheshimimen kelisemin. Prezıdentimiz, Úkimetke senemin. Qazaqstannyń gúldengenin qalaımyn. Órkenıette ómir súrgimiz keledi. Balalarymyzdyń bolashaǵy úshin qoldaımyz», - dedi ol.
Jambyl aýdanynyń ákimi Nurlan Ertastyń aıtýynsha, turǵyndardyń 90 paıyzy AES qurylysyn qoldap otyr.
«Adamdar AES mańyzdylyǵyn jaqsy túsinedi. Árbir kezdesýde adamdar qurylys qashan bastalatyndyǵyn, jalpy atom stansa qashan salynatyndyǵyn suraıdy. Turǵyndar elpektr energııasy tapshylyǵyn sezinip otyr. Sondyqtan da biz bul jobany júzege asyrýymyz qajet. Kóptegen sarapshy da qurylysqa qoldaý bildirýde. Biz AES salýymyz qajet. Bul – jańa jumys orny, ınvestıtsııa, aýyldyń áleýmettik-ekonomıkalyq ál-aýqaty», - dedi aýdan ákimi.
