Úlken áýlettiń úkilegen úmiti edi — Mańǵystaýda qaza tapqan sarbazdyń ustazy
ORAL. KAZINFORM — Batys Qazaqstan oblysy Báıterek aýdany Volodar orta mektebiniń túlegi Ómirbek Ómirzaqtyń qalaı oqyǵany týraly ustazy, qazaq tili men ádebıeti pániniń muǵalimi Aıdana Ǵabbasova aıtyp berdi.
A.Ǵabbasovanyń málim etkenindeı, shákirtiniń mezgilsiz dúnıeden ótkeni óte aýyr tıgen.
— Kóz aldyma mektep qabyrǵasynda júrgen jýas minezdi, aqkóńil, tárbıeli balanyń beınesi qaıta-qaıta kele beredi. Oqýshy kezinen Mahambet, Maǵjan óleńderin erekshe yqylaspen, mánerine keltirip oqıtyn. Baıqaýlarǵa qatysyp, júldeli oryndarǵa ıe bolǵany áli kúnge deıin kóz aldymda. Sahnadaǵy tolqynysy, qýanyshy, ónerge degen qushtarlyǵy ustazdyq jadymda máńgi saqtalary anyq, — deıdi A.Ǵabbasova.
Synyp jetekshisi bolǵan onyń aıtýynsha, Ómirbek Ómirbolatuly jan-jaqty, ónerge jaqyn bala edi. Mánerlep oqýmen qatar, gıtarada oınap, sýret salatyn. Ár isine jaýapkershilikpen qarap, óziniń erekshe qabiletimen kózge túsetin.
— Áýletiniń tuńǵysh nemeresi, ájesiniń baýyrynda ósken ardaqty perzent edi. Atasy Ómirzaq — Aýǵanstan soǵysynyń ardageri. Osyndaı úlken áýlettiń úkilegen úmiti, ájesiniń aıalap ósirgen nemeresi edi. Ustaz úshin ár shákirttiń orny bólek. Al ómirden tym erte ketken shákirttiń beınesi kóńilde tipti erekshe saqtalady eken. El qorǵaý jolynda júrip, týǵan úıine oralýyna nebári 9 kún qalǵan edi degendi estý tipti aýyr, — dedi A.Ǵabbasova.
Mańǵystaýda Batys Qazaqstan oblysynan qaza tapqan taǵy bir sarbaz Jeńis Temirǵalıev Bórli aýdany ortalyǵy Aqsaı qalasyndaǵy № 1 orta mektepte bilim alǵan.
Ustazdarynyń eske túsirýinshe, Jeńis Tileýishuly bilim ordasynda asa yqylaspen oqyp, pánder boıynsha jaqsy baǵalarǵa ıe boldy. Ol sabaqtarǵa belsendi qatysty, óz oıyn naqty ári tolyq jetkize aldy, berilgen tapsyrmalardy ýaqytyly ári sapaly oryndady. Óz betinshe jumys isteý daǵdysy jaqsy damyǵan, qıyndyqtardy jeńýde tabandylyq kórsete bildi.
Til, ádebıet, jaratylystaný, tarıh pánderin qyzyǵýshylyqpen oqydy, sporttyq sharalarǵa, túrli baıqaýlarǵa belsendi qatysty. Ásirese, badmınton, fýtbol, basketbol sporty túrleri boıynsha júldeli oryndardan kórindi.
— Synyptastarymen qarym-qatynasy jaqsy, dostaryna kómektesýge árdaıym daıyn turatyn edi. Muǵalimder men úlkenderge qurmetpen qaraıtyn, tártibi úlgili oqýshylarymyzdyń biri boldy. Ujymdyq is-sharalarda belsendilik tanytyp, synyptyń qoǵamdyq ómirine belsene aralasty. Otbasymen turaqty baılanysta boldyq. Ata-anasynyń tárbıesin alǵan sypaıy, aqkóńil, salmaqty, erekshe oqýshy boldy. Bilimge qushtar, ómirde alar asýlary mol edi. Osyndaı shákirtimizdiń ómirden erte ketkeni óte ókinishti. Otbasyna, barlyq aǵaıyn-týystaryna qaıǵylaryna ortaqtasyp, kóńil aıtamyz, — deıdi Jeńis Temirǵalıevtiń muǵalimderi.
Eske sala keteıik, budan buryn Mańǵystaýda qaza tapqan áskerı qyzmetshilerdi aty-jónderi belgili bolǵanyn jazǵan edik.
Sondaı-aq Mańǵystaýda qaza tapqan batysqazaqstandyq sarbazdardyń denesi Oralǵa jetkizildi.
