Úlken aýylynda áýejaı salynýy múmkin - Almaty oblysynyń ákimi
QONAEV. KAZINFORM – Almaty oblysynyń Jambyl aýdanyna elimizdegi alǵashqy atom elektr stantsııasy salynady.
AES qurylysyna baılanysty Úlken aýyly mańyndaǵy ınfraqurylymdy damytý, onyń ishinde áýejaı salý josparlanyp otyr. Bul týraly Almaty oblysynyń ákimi Shyńǵys Árinov Jambyl aýdany turǵyndarymen kezdesýi kezinde aıtty.
Odan bólek ol Úlken aýylynda táýligine 50 adamdy qabyldaıtyn dárigerlik ambýlatorııanyń qurylysy jeltoqsan aıynda aıaqtalatynyn málimdedi.
- Búginde Almaty oblysynda 368 eldi meken bar. Ár aýyl kúndelikti ómirge qajetti ınjenerlik ınfraqurylymmen, bilim berý, medıtsınalyq, tótenshe jaǵdaı qyzmeti nysandarymen, Mádenıet úıi jáne oıyn alańdarymen qamtylýy tıis. Munyń bárin birden sheshý múmkin emes. Tyńǵylyqty josparyn daıyndap, kezeń-kezeńimen iske asyramyz, – dedi Shyńǵys Árinov.
Eske salaıyq, buǵan deıin Úlken aýylynda 33 myńǵa deıin turǵyny bar atomshylar qalashyǵyn salý josparlanǵanyn jazǵanbyz.
QR Atom energııasy jónindegi agenttiginiń tóraǵasy Almasadam Sátqalıevtiń aıtýynsha, 33 myńǵa deıin adam turýǵa eseptelgen atomshylar qalashyǵy qoldanystaǵy aýyldyń quramyna biriktiriledi. Munda turǵyn úıler, mektepter, medıtsınalyq nysandar, kadrlardy daıarlaý jáne qaıta daıarlaý ortalyqtary salynyp, qonaqúı ınfraqurylymy, qyzmet kórsetý salasy men bıznes te damytylady. Josparlaý kezinde AES qurylysyn qamtamasyz etý úshin salynatyn nysandardy keıingi kezeńde paıdalaný múmkindigi de qarastyrylady.
Jaqynda Rosatom basshysy Qazaqstandaǵy alǵashqy AES-tiń aýqymdy qurylysyn bastaýǵa daıyndyq júrip jatqanyn aıtty.