Úlken aýylynda 33 myńǵa deıin turǵyny bar atomshylar qalashyǵyn salý josparlanyp otyr

Bul týraly Qazaqstan Respýblıkasy Atom energııasy jónindegi agenttiginiń tóraǵasy Almasadam Sátqalıev Túrkııadaǵy «Akkýıý» AES-inde jumys isteıtin qazaqstandyq mamandarmen kezdesý barysynda málimdedi.

Onyń aıtýynsha, 33 myńǵa deıin adam turýǵa eseptelgen atomshylar qalashyǵy qoldanystaǵy aýyldyń quramyna biriktiriledi. Munda turǵyn úıler, mektepter, medıtsınalyq nysandar, kadrlardy daıarlaý jáne qaıta daıarlaý ortalyqtary salynyp, qonaqúı ınfraqurylymy, qyzmet kórsetý salasy men bıznes te damytylady.

-Bul jeke jumysshylar kenti bolmaıdy. Bul – ómir súrýge qajetti barlyq ilespe ınfraqurylymy bar Úlken aýylynyń damýy, – dep atap ótti Almasadam Sátqalıev.

Josparlaý kezinde AES qurylysyn qamtamasyz etý úshin salynatyn nysandardy keıingi kezeńde paıdalaný múmkindigi de qarastyrylady. Qurylys jumystary aıaqtalǵannan keıin olardy aýyldyń qajettilikterine jáne kásipkerlikti damytýǵa paıdalanýǵa bolady.

Zamanaýı tsıfrlyq sheshimderdi engizýge de erekshe nazar aýdarylady. Agenttik basshysynyń aıtýynsha, Úlkendi Balqash jaǵalaýyndaǵy eń ozyq eldi mekenderdiń birine aınaldyrý josparlanyp otyr. Aýyldyń tabıǵı landshafty men ornalasýy da demalys pen týrızmdi damytýǵa múmkindik beredi.

Sonymen qatar bolashaq AES qyzmetkerlerin daıarlaý, qaıta daıarlaý jáne olardyń biliktiligin arttyrýǵa arnalǵan oqý-jattyǵý ortalyǵyn ornalastyrý kózdelgen.

Almasadam Sátqalıevtiń aıtýynsha, bir AES qurylysynyń qarqyndy kezinde 15 myńǵa deıin jumysshy (ınjener-qurylysshylar, dánekerleýshiler, montajshylar, elektr mamandary, avtomattandyrý jáne sapany baqylaý jónindegi mamandar) al stantsııany keıinnen paıdalaný kezeńinde shamamen 2 myń qyzmetker (atom ınjenerleri, reaktor qondyrǵylarynyń operatorlary, ıadrolyq jáne radıatsııalyq qaýipsizdik, jabdyqtarǵa tehnıkalyq qyzmet kórsetý jáne olardy jóndeý jónindegi mamandar) qajet bolady.

Kadrlardy daıarlaý Qazaqstan Respýblıkasynyń beıindi oqý oryndarymen, sondaı-aq Qytaı men Reseıdiń mamandandyrylǵan bilim berý uıymdarymen yntymaqtastyq aıasynda júzege asyrylady.

-Budan bólek, atom salasynyń qyzmetkerlerine «Bolashaq» halyqaralyq stıpendııalyq baǵdarlamasy aıasynda bilim alý múmkindigi usynylatyny habarlandy. Baǵdarlama sheńberinde atom salasyndaǵy jetekshi sheteldik uıymdarda magıstratýra, doktorantýra baǵdarlamalary boıynsha bilim alýǵa jáne taǵylymdamadan ótýge arnaıy kvotalar qarastyrylǵan,-delingen habarlamada.

Agenttik basshysy Úlken aýylynyń damýy jastarǵa jumysqa ornalasý men kásibı mansabyn qalyptastyrýdyń jańa múmkindikterin ashatynyn atap ótti. Sondaı-aq mamandardyń turǵyn úımen qamtamasyz etiletinin aıtty.

Osyǵan deıin Abaı dańǵylyn Úlken Almaty aınalma jolyna jalǵaýǵa 600 metr qalǵany týraly jazdyq.