Úlken aýyly turǵyndary referendýmǵa belsendi qatysyp jatyr

QONAEV. KAZINFORM — Búgin Úlken aýyldyq okrýgindegi № 332 referendým ýchaskesi jumysyn bastady. Tańerteńnen bastap aýyldyń 150-den astam turǵyn óz tańdaýyn jasady.

«Búgingi referendýmnyń mańyzy zor. Bul — halyqtyń eldiń bolashaǵyna qatysty sheshimderdi óz qolyna alatyn sáti. Árbir daýys berýshiniń tańdaýy mańyzdy. Óz tańdaýymyzben biz memleketimizdiń damýyna úles qosamyz. Meni búgingi referendýmǵa azamattyq boryshym jeteledi. Biz óz bolashaǵymyzǵa nemquraıly qaramaýymyz kerek», — dedi aýyl turǵyny Rahıma Qaıyrbekova.

Jalpy, Almaty oblysy boıynsha 643 daýys berý ýchaskesi bar. Jambyl aýdanynda 77 ýchaske jumys istep tur. Sondaı-aq oblystyq komıssııanyń resmı ınternet-resýrsynda «Referendým-2024» atty bólimshe quryldy. Bul bólimde únemi ınfografıka, beıne jáne aýdıomaterıaldar sııaqty medıa-kontent jarııalanyp otyrady. 

Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.

Ortalyq referendým komıssııasy tóraǵasynyń orynbasary Konstantın Petrov eldiń barlyq óńirinde Qazaqstanda atom elektr stantsııasyn salý máselesi boıynsha jalpyulttyq referendým bastalǵanyn resmı málim etti.

Buǵan deıin habarlanǵanyndaı, Premer-mınıstr Oljas Bektenov Astana qalasyndaǵy Oqýshylar saraıynda ornalasqan №61 ýchaskede daýys berdi.

1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.