Úlken Almaty men Aqsaı ózenderi shatqaldarynda selge qarsy bógetter ornatylyp jatyr
Almaty qalasynyń bıik taýly aımaǵynda («Úlken Almaty», «Aqsaı», «Qarǵaly» jáne «Kishi Almaty») 146 muzdyq, 50-den astam muzdaq-muzdyq kól bar.
Sel qaýipsizdigin qamtamasyz etý úshin Úlken Almaty jáne Aqsaı ózenderiniń basseınderinde seldi ustap qalatyn eki bógettiń qurylysy júrip jatyr. Osy ózenderdiń joǵary jaǵynda 116 sel qaýipti ýchaskeler, 114 muzdyq, 35 muzdaq-muzdyq kólder bar, onyń 9-ynda jarylys qaýpi bar.
«Qazseldenqorǵaý» jáne Almaty qalasy TJD basshylyǵy BAQ ókilderi úshin baspasóz týryn uıymdastyrdy. Jýrnalısterge Úlken Almaty ózeniniń joǵarǵy aǵysyndaǵy, Bostandyq aýdany Aıýsaı ózeniniń saǵasynan tómen ornalasqan bógettiń tehnıkalyq sıpattamalary týraly aıtyldy. Onyń bıiktigi 41 metrden asady, selden qorǵaý kólemi – 2,3 mln tekshe metr.
Naýryzbaı aýdanyndaǵy Aqsaı ózeninde de seldi ustap qalatyn bógettiń qurylys-montajdaý jumystary júrip jatyr. BAQ ókilderine bógettiń maketi kórsetildi. Aqsaı ózeniniń basseıni Úlken Almaty sııaqty sel qaýpiniń birinshi sanatyna jatatyny týraly aıtyldy. Bógettiń bıiktigi – 75 metr, selden qorǵaý kólemi – 7 mln tekshe metr.
Seldi ustap qalatyn bógetter qurylysynyń josparly aıaqtalý merzimi – 2023 jyl.
Almaty qalasy TJD baspasóz qyzmetiniń aqparatyna sáıkes, Úlken Almaty jáne Aqsaı ózenderi basseınderiniń sel qaýpi joǵary. Olardyń áser etý aımaǵynda 5 myńnan astam turǵyn men demalýshy, sondaı-aq ońtústik astananyń qonaqtary men qyzmet kórsetýshi personal qalýy múmkin. Sel qaýpi bar aımaqta jazǵy kezeńge aerovızýaldy tekserýler júrgizý kezinde tek Úlken Almaty ózeniniń basseıni boıynsha mamandar úsh myńnan astam avtomashına men 60 avtobýsty eseptedi.
Bógetterdiń qurylysy sel tasqynynan bolatyn qaýipti barynsha azaıtýǵa múmkindik berip, Almaty qalasynyń Bostandyq, Naýryzbaı, Almaly aýdandary men Almaty oblysy Qarasaı aýdanynyń shyǵys bóliginiń halqyn jáne obektilerin senimdi qorǵaýdy qamtamasyz etetin bolady.
Sonymen qatar, halyqty sel qaýpi týraly ýaqtyly habardar etý úshin eki shatqaldyń aýmaǵynda 51 dabyl qurylǵysy ornatyldy.
Almaty qalasy ákimdiginiń belsendi qoldaýymen sońǵy jyldary aldyn alý jumystaryn júrgizý úshin, «Qazseldenqorǵaý» qajettilikterine jergilikti bıýdjet qarajatynan 2 ekskavator, 10 jyljymaly úı, ónimdiligi joǵary 10 sorǵy, 2 000 metr sıfon qubyry jáne bir jeńil avtokólik satyp alyndy.
