Úlken Almaty kóline aparatyn jolǵa kúrdeli jóndeý júrgiziledi
NUR-SULTAN. QazAqparat - Úlken Almaty kóline aparatyn jolǵa kúrdeli jóndeý júrgiziledi. «QazAvtoJol» UK» AQ qurylys maýsymyna aýqymdy daıyndyq jumystaryn bastap ketti, dep habarlaıdy QazAqparat.
Aktsıonerlik qoǵamnyń baspasóz qyzmetiniń málimetinshe, máselen, respýblıkalyq mańyzy bar Almaty – Kosmostantsııa trassasynyń 8-34 shaqyrymy aralyǵyndaǵy bólik (Alma-Arasan shıpajaıyna kireberis) kúrdeli jóndeýden ótedi.
«Qoǵamdyq tyńdaý ótti. Belsendiler daýys berip, Úlken Almaty kóline aparar joldy kúrdeli jóndeýge qarsy emes ekendikterin jetkizdi. Búginde jobalaý-smetalyq qujattary daıyn, ekologııalyq saraptama satysynda tur. Saraptamanyń oń qorytyndysyn alǵannan keıin konkýrs jarııalanyp, zańnamaǵa sáıkes merdiger anyqtalady. Sodan keıin ýchaskede qurylys-montaj jumystary júrgiziledi»,-delingen habarlamada
Aıta ketý kerek, jol eki jolaqty bolyp qala bermek. Sonymen qatar, jobada 1-ge 10 ótemdik aǵash otyrǵyzý qarastyrylǵan.
Kúrdeli jóndeý jumystary aıasynda aýmaqta baqylaý alańdary, avtokólikterge arnalǵan turaqtar jáne tastyń qulaýynan qorǵaıtyn torlar salynbaq.
Jol ınfraqurylymyn qaıta qurý jumystary týrızmdi odan ári damytýǵa oń áser etedi jáne qonaqtar men jergilikti turǵyndar úshin qolaıly jaǵdaı jasaıdy. Al tótenshe jaǵdaılar kezinde arnaıy tehnıka jergilikti jerge odan da jyldam jetedi.
Bul jobany 24 aıda júzege asyrý josparlanyp otyr.
Esterińizge sala keteıik, Almaty - Kosmostantsııa respýblıkalyq mańyzy bar jol III sanatqa jatady, jabyny - asfalt-beton. Onyń uzyndyǵy 26 shaqyrym.
