Úlken Almaty kóline aparatyn jolǵa kúrdeli jóndeý jumystary júrgiziledi

ALMATY. QazAqparat - Úlken Almaty kóline aparatyn jolǵa kúrdeli jóndeý jumystaryn júrgizýge aýqymdy daıyndyq jumystary bastaldy. Bul týraly «QazAvtoJol» ulttyq kompanııasynyń baspasóz qyzmeti málimdedi, dep habarlaıdy QazAqparat tilshisi.

Ulttyq kompanııanyń málimetinshe, respýblıkalyq mańyzy bar «Almaty–Kosmostantsııa» trassasynyń 8-34 shaqyrym aralyǵy ýchaskesi («Alma-Arasan» shıpajaıyna kireberis) kúrdeli jóndeýden ótedi.

«Keshe qoǵamdyq tyńdaý ótti. Belsendiler daýys berip, Úlken Almaty kóline aparar joldy kúrdeli jóndeýge qarsy emes ekendikterin jetkizdi.

Búginde jobalaý-smetalyq qujattama daıyn, ekologııalyq saraptama satysynda tur. Saraptamanyń oń qorytyndysyn alǵannan keıin konkýrs jarııalanyp, zańnamaǵa sáıkes merdiger anyqtalady. Sodan keıin ýchaskede qurylys-montaj jumystary júrgiziledi. Aıta ketý kerek, jol eki jolaqty bolyp qala bermek. Sonymen qatar, jobada 1-ge 10 ótemdik aǵash otyrǵyzý qarastyrylǵan»,- delinedi «Qazavtojol»-dyń habarlamasynda.

Kúrdeli jóndeý jumystary aıasynda aýmaqta baqylaý alańdary, avtokólikterge arnalǵan turaqtar jáne tas qulamasynan qorǵaıtyn torlar salynbaq.

«Kazavtojol» UK ókilderiniń aıtýynsha, jol ınfraqurylymyn qaıta qurý jumystary týrızmdi odan ári damytýǵa oń áser etedi jáne qonaqtar men jergilikti turǵyndar úshin qolaıly jaǵdaı jasaıdy. Al tótenshe jaǵdaılar kezinde arnaıy tehnıka jergilikti jerge odan da jyldam jetedi.

Jobany 24 aıda júzege asyrý josparlanyp otyr.

Aıta keteıik, Almaty - Kosmostantsııa respýblıkalyq mańyzy bar jol III sanatqa jatady, jabyny - asfalt-beton, uzyndyǵy 26 shaqyrym.