Úlken Almaty kólinde syrǵanaǵan qyz Reseıde shoý baǵdarlamaǵa qatysty
ALMATY. QazAqparat - Úlken Almaty kólinde syrǵanap, kópshilikke tanylǵan almatylyq boıjetken Ksenııa Pankratova Reseıdiń «Pervyı kanal» arnasyndaǵy baǵdarlamada qonaqta boldy.
Mánerlep syrǵanaýshy óziniń Reseıge sapary jóninde QazAqparat tilshisine aıtyp berdi.
Mıllıonnan asa adam tamashalaǵan vıdeony Aleksandr Smol júrgizetin «Vıdelı vıdeo?» baǵdarlamasy sıýjetke laıyq dep tapty.
Baǵdarlama qonaqtary da suhbat ústinde boıjetkenniń talanty men Qazaqstannyń tabıǵatyna tamsanýmen boldy.
«Vıdeoǵa qarap ne aıtýǵa bolady? Ártistik - 10, tehnıka - 10, 1 mıllıon adam qaraǵan», - dedi vıdeony tamashalaǵan soń júrgizýshi.
Sportshynyń qabiletin Reseı konkı sportynyń eńbek sińirgen sport sheberi Aleksandr Kıbalko baǵalady.
«Bizde mundaı muz aıdyny bolady. Biraq ol shatyrdyń ústinde bolady. Bul jerde mynadaı muzdy paıdalanbaý múmkin emes. Keremet vıdeo! Osy sportty nasıhattap jatqanyńyzǵa alǵys aıtamyn», - dedi reseı konkıshisi.
Shoýda Ksenııa Úlken Almaty kólindegi óneri qandaı shý týǵyzǵanyn aıtyp berdi.
«Úlken Almaty kóli - Almatynyń jaýharlarynyń biri. Kól teńiz deńgeıinen 2500 metr bıiktikte ornalasqan. Aınalasyn taý qorshap tur. Bul -qalamyzdyń júregi. Kól strategııalyq nysan bolyp tabylady. Oǵan shyǵýǵa ruqsat etilmegen. Bul nysandy shekara saqshylary kúzetedi. Biz sol kúni dostarymyzben birge kólge bardyq. Ol jerde adamdar kóp júr eken. Arasynda syrǵanap jatqandary da bar. Men de syrǵanaıyn dep sheshtim. Biraq meniń rolıgimdi kórgen adamdar birden áleýmettik jelide talqyǵa sala bastady. Myna qyzdy otyrǵyzý kerek, 15 táýlikke jabý kerek degender boldy. Meni polıtsııaǵa shaqyrdy», - dedi Ksenııa.
Boıjetken bolashaqta osyndaı vıdeolardy kóptep túsirmekshi ekenin aıtty.
«Birinshi kezekte elimniń kórkem jerlerin kórsetkim keldi. Bizde ǵajap jerler óte kóp. Jaqynda Medeýde osyndaı vıdeo túsirdik», - dedi K.Pankratova.
Shoý qatysýshylary, sarapshylar Ksenııaǵa Qazaqstannyń týrızmin damytýǵa QR Mádenıet jáne sport mınıstrliginen usynys túsýi kerektigin aıtty.
Ksenııaǵa Amerıkadan adamdar hat jazǵan. Olar Ksenııanyń perfomansyn amerıkalyq shoýda kórsetýge ruqsat suraǵan.
«Olardyń paraqshalarynda kún saıyn bul shoýdy 2 mln adam qaraıdy. Olar meniń vıdeomdy áleýmettik jelige salmaq. Bul rolık týrızmdi damytýǵa yqpal etedi dep oılaımyn», - dedi fıgýrıst.
Aıta ketý kerek, «vırýsty beınerolık» áleýmettik jelide keń tarap ketti. Bul beınerolıkti 2 apta ishinde 1 mıllıon adam tamashalaǵan.
