Úlken Almaty kólinde syrǵanaǵan boıjetken Qaıyńdyda rolık túsirdi
ALMATY. QazAqparat - Úlken Almaty kólinde mánerlep syrǵanaýymen kózge túsken Ksenııa Pankratova Kólsaıdaǵy Qaıyńdy kólinde rolık túsirdi, dep habarlaıdy QazAqparat tilshisi.
Bul vıdeo Ksenııanyń Instagram paraqshasynda jarııalandy.
«Qaıyńdy kóliniń ǵajaıyp sulýlyǵy! Sýyq! Aıaq astynda tyrsyldap jarylǵan muz. Bul shynaıy tabıǵat úni», - dep jazdy ol vıdeoǵa túsinikteme retinde.
Ksenııa qaýipti jaǵdaıda syrǵanaǵan. Túsirilim kezinde muz erip, syqyrlap jarylyp jatqan.
Aıta keterligi, osy joly sportshy qyzǵa qalalyq týrıstik ortalyq tapsyrys bergen. Ortalyq osy vıdeo arqyly Qazaqstannyń týrıstik múmkindigin arttyra túspek.
Aıta ketý kerek, almatylyq mánerlep syrǵanaýshy, bapker Ksenııa Pankratova Úlken Almaty kólinde konkımen syrǵanap vıdeo túsirgen bolatyn. Bul vıdeorolık áleýmettik jelide tarap, 2 apta ishinde 1 mıllıon adam tamashalaǵan.
Sonymen qatar, jaqynda KsenııaReseıdiń «Pervyı kanal» arnasynyń «Vıdelı vıdeo» baǵdarlamasynda qonaqta boldy. Baǵdarlama qonaqtary da suhbat ústinde boıjetkenniń talanty men Qazaqstannyń tabıǵatyna tamsanýmen boldy.
