Úlken Almaty kólinde «selfıge» arnalǵan oryn paıda bolady
ALMATY. QazAqparat - Úlken Almaty kólinde «selfıge» arnalǵan oryn paıda bolady, dep habarlaıdy QazAqparat tilshisi.
Búgin Úlken Almaty kóliniń mańaıynda hostel ıeleri men qalalyq týrızm basqarmasynyń ókilderi rekreatsııalyq aımaqtyń týrısterge qoljetimdiligi máselesin talqylady.
Munyń aldynda Shakır Islambakıev esimdi Facebook qoldanýshysy óz narazylyǵyn bildirgen bolatyn.
Er adamnyń aıtýynsha, Úlken Almaty kóline qydyryp barǵan sheteldik stýdentterden kúzetshiler 44 myń teńgesin tartyp alǵan.
Keıin onyń jazbasyna Іle Alataýy ulttyq parkiniń baspasóz qyzmeti resmı jaýap bergen.
«Muz sógildi! Keremet jańalyq! Búgin ÚAK kóshpeli jıynǵa qatystym. Jıyndy qalalyq Týrızm jáne syrtqy baılanystar basqarmasy uıymdastyrdy. Ákimdiktiń únsiz qalmaǵanyna qýanyshtymyn!», - deıdi hostel ıesi Shakır Islambakıev.
Onyń aıtýynsha, endi Úlken Almaty kólinde:
1) Kóldiń aınalasyna deıin ruqsat etilgen jerlerdiń shekarasy aıqyndalatyn boldy.
2) Osy shekaranyń perımetrimen qorshaý qoıylady. Mańyzdysy, qorshaýdyń ózi landshaftty buzbaıtyn bolady.
3) Ár 50 metr saıyn qazaq, orys, aǵylshyn tilinde aqparat taqtalary ornatylady. Ereje buzǵan jaǵdaıda aıyppuldar týraly aqparat ilinedi.
4) ÚAK abattandyrý jobasy daıyndalady. «Selfı» jasaıtyn arnaıy oryn, saıaly oryndar, alańdar jasalady. Jańa joba jaqynda qoǵamdyq talqylaýǵa usynylady.
5) Kól aınalasynda avtoturaq máselesi óz sheshimin tabady.
6) Kóldi qorǵaý qyzmetkerleriniń arasynda sybaılas jemqorlyqtyń aldyn alý boıynsha jumys júrgiziledi.
