Úlken Almaty kanaly ústindegi kópirdi jóndeý jumystary qashan aıaqtalady
Almaty ákimdigi habarlaǵandaı, vızýaldy tekseris barysynda negizgi úsh másele anyqtaldy.
Birinshi: turǵyndar úshin kópirge túsip-shyǵý qaýipti jaǵdaıǵa aınalǵan. Kópirdiń tirek qabyrǵalary men qurylymynda plıtalardyń bólinýi baıqalady. Bul jaıaý júrginshilerdiń ómirine qaýip tóndiredi.
Ekinshi: kópirdiń gıdroızolıatsııasy buzylǵan. Mundaı aqaý kópirde apat bolý yqtımaldylyǵyn arttyrady.
Úshinshi: kópirdiń kóp bóliginde jartylaı qulap jatqan plıtalar suryqsyz kórinedi.
«Kópirdi jóndeý 2023 jylǵa josparlanǵan joq, degenmen, turǵyndardyń ótinishi boıynsha ol Seıfýllın kóshesindegi joldardy aǵymdaǵy jóndeý baǵdarlamasyna engizildi. Qazirgi ýaqytta búlingen granıt plıtalar bólshektelip, tazartylyp, ornyna qoıyldy, juqa qaptamalar kúsheıtilgen bekitpelerge aýystyryldy. Qazirgi ýaqytta granıtti satylardy bólshekteý, tegisteý jáne ornatý, tireý qabyrǵalaryn taqta taspen qaptaý, aralyq qurylystyń qasbeti men arqalyǵyn boıaý jumystary aıaqtaldy. Tóbeler men qabyrǵalarǵa plıtalardy tegisteý jáne tóseý jumystary jalǵasýda», - dep habarlady Almaty ákimdigi.
Almaty ákimi Erbolat Dosaev jóndeý jumystary kezinde kópirdiń jaıaý júrginshiler úshin qaýipsiz bolýyn nazarǵa alýdy tapsyrdy.
«Biz kópirdiń arhıtektýralyq kelbetin buzbaýǵa tyrysamyz. Infraqurylymnyń tozatyny belgili. Bul jaǵdaıda bir nárseni ózgertýge májbúrmiz, biraq arhıtektýralyq ansambldi, qurylymnyń bastapqy túrin múmkindiginshe saqtaımyz. Qazirgi tańda barlyq jumys sapaly oryndaldy, jasandy materıal joq, búkil jerde tabıǵı tas tur», - dedi Erbolat Dosaev.
Ol sondaı-aq kópirdiń aǵymdaǵy jóndeý jumystaryn qarasha aıynyń basyna deıin aıaqtaýdy, sondaı-aq, saraptama júrgizýdi, qajet jaǵdaıda kópirdiń kúrdeli jóndeý jumystaryn 2024 jylǵa arnalǵan josparǵa engizýdi tapsyrdy.
Aıta keteıik, ÚAK ústinen ótetin kópir 1982 jyly salynǵan. Sondaı-aq Túrksib aýdanynyń turǵyndary kópirdi jóndeý týraly ákimdikke birneshe ret ótinish bildirgen.