Úlken Almaty aınalma jolynyń qurylysy bastaldy
Jıyn basynda jobany júzege asyrý barysy týraly prezentatsııamen «Alsım Arko» AQ kontsessıoner kompanııasynyń vıtse-prezıdenti Abbas Shahın tanystyrdy. Saltanatty jıynda Úkimet basshysynyń birinshi orynbasary Asqar Mamın jobanyń mańyzdylyǵyna aıryqsha toqtalyp ótti.
«Úlken Almaty aınalma avtokólik jolynyń qurylysy (ÚAAAJ)- «Nurly jol» baǵdarlamasynyń aıasynda júzege asyrylyp jatqan irgeli joba. Ony júzege asyrý Qazaqstan ekonomıkasy úshin mańyzdy oqıǵa bolmaq. Bul memlekettik-jekeshelik áriptestik mehanızmin qoldaný arqyly ınfraqurylymdy damytýdyń alǵashqy iri jobasy, ony júzege asyrýǵa iri halyqaralyq kompanııalar qatysady. Jobanyń quny 180 mlrd teńgege jýyq. 4 jyldan keıin tolyq iske qosylady dep josparlanǵan. Búgin biz ÚAAAJ qurylysyn bastap otyrmyz. Barshańyzdy osy qýanyshty jańalyqpen quttyqtaımyn», - dedi birinshi vıtse-premer.
Óz kezeginde Almaty oblysynyń ákimi Amandyq Batalov aınalma jol qurylysynyń oblys ekonomıkasyn damytýdaǵy mańyzyna toqtaldy. Bul mańyzdy avtokólik joly oblystyń 3 aýdanynyń - Qarasaı, Іle, Talǵar aýdandarynyń aýmaǵyn basyp ótedi.
«Búgin biz Elbasynyń tikeleı tapsyrmasymen asa iri jobany bastap otyrmyz. Bul jobanyń Almaty oblysy úshin de mańyzy zor. Elbasy saıasatynyń arqasynda jáne «Nurly jol» baǵdarlamasynyń nátıjesinde oblys aýmaǵynda «Batys Eýropa - Batys Qytaı», «Almaty - Taldyqorǵan» sııaqty halyqaralyq standarttaǵy iri avtokólik joldary salyndy, ÚAAAJ osy kólik dálizderiniń jalǵasy bolmaq. Aınalma avtojoly aıaqtalǵannan keıin bul óz kezeginde oblystaǵy shaǵyn jáne orta bıznestiń, jol boıyndaǵy qyzmet kórsetý men kólik-qoıma termınaldarynyń damýyna áser etip, mýltıplıkatıvti tıimdiligin kórsetetin bolady. Sonymen qatar ónerkásip oryndary úshin naryqqa jol ashýǵa múmkindik jasaıdy», - dedi A. Batalov.
Sondaı-aq oblys basshysy atap ótkendeı, qurylys kezinde 3 myńnan astam jumys orny qurylyp, onyń 90% jergilikti turǵyndar quraıtyn bolady. Al qurylysy aıaqtalǵannan keıin 2 myńǵa jýyq turaqty jumys orny ashylady. Jalpy 300 mlrd teńgege jýyq ınvestıtsııa tartý kózdelgen. Jobany júzege asyrý úshin oblys ákimdigi tarapynan barlyq tıisti sharalar qabyldanǵan, ıaǵnı qajetti jer ýchaskeleri der kezinde bosatyldy, vahtalyq qalashyqtardy, beton jáne asfalt zaýyttaryn ornalastyrý men olardy barlyq kommýnıkatsııa júıelerine qosý, qazý oryndaryn belgileý máseleleri sheshildi.
Sóziniń qorytyndysynda Amandyq Batalov oblys ákimdigi qurylystyń sapaly jáne merziminde talqylaýyna barynsha qoldaý kórsetetinin jetkizdi.
