Úlken Almaty aınalma joly: Qurylysqa 90% jergilikti turǵyndar qabyldanady

TALDYQORǴAN. QazAqparat - Búgin Almaty oblysynyń ákimi Amandyq Batalov «Úlken Almaty aınalma avtokólik joly» jobasynyń kontsessııasy boıynsha QR Investıtsııalar jáne damý mınıstrligi uıymdastyrǵan konkýrstyń jeńimpaz kompanııasymen kezdesip, jobanyń oblys aýmaǵynda júzege asyrylý barysyn talqylady. Bul týraly Almaty oblysy ákiminiń baspasóz qyzmetinen málim etti, dep habarlaıdy QazAqparat. 

«Úlken Almaty aınalma avtokólik jolynyń» (ÚAAAJ) iske asyryla bastaǵanyna qýanyshtymyz. Elbasymyz Nursultan Ábishuly Nazarbaevtyń turaqty baqylaýynyń nátıjesinde osyndaı úlken joba qolǵa alyna bastady. Bul jol Almaty qalasyndaǵy kólik legin azaıtýǵa baǵyttalǵan. Degenmen, ÚAAAJ-nyń aınalma joly oblystyń Qarasaı, Іle, Talǵar aýdandarynyń aýmaǵyn da basyp ótedi. Sondyqtan qazirden bastap óz tarapymyzdan barlyq uıymdastyrý máseleleriniń sapaly atqarylýyna yqpal etýimiz kerek. Jobaǵa baılanysty 742 jer ýchaskesin bosattyq, bul baǵyttaǵy máseleler tolyq sheshimin tapty. Endigi jerde tehnıkalyq sıpattaǵy máselelerge nazar aýdaryp, olardyń barlyǵyn der kezinde retteýimiz kerek. Óz kezeginde merdiger kompanııalar júktelgen mindetterdi oryndaýy tıis», - dedi A. Batalov.

Munan soń «ALSIM ARKO» AQ kontsessıoner kompanııasynyń vıtse-prezıdenti Abbas Shahın jobanyń tanystyrylymyn jasap, ony júzege asyrý, qurylys jumystaryn uıymdastyrý jóninde baıandady. Ol toqtalǵan máseleler qatarynda vahtalyq lager, karerge arnalǵan burma, ınertti materıaldardy paıdalaný kólemi jáne taǵy basqalary bar.

Oblys ákimi A. Batalov atap ótkendeı, ÚAAAJ jobasyna qatysty týyndaǵan kez kelgen máseleni eń aldymen joǵaryda atalǵan úsh aýdannyń ákimderi jáne tıisti basqarmalardyń basshylary sheshýi tıis.

«Joba júzege asyrylatyn úsh jyl ishinde oblysqa 512,3 mlrd teńge ınvestıtsııa tartylady. Oǵan qosa, jańa jumys oryndary ashylady, osy jobany iske asyrý kezinde jumysqa qabyldanatyndardyń 90% jergilikti turǵyndardan bolady, - dedi A. Batalov.

Kezdesý sońynda oblys ákimi bul jobanyń oryndalý barysy osy salaǵa jetekshilik etetin orynbasarlary A. Baıjanov pen J. Tuıaqovtyń jiti baqylaýynda bolatynyn aıtty.

Atap ótsek, «Úlken Almaty aınalma avtokólik joly» jobasy uzyndyǵy 66 shaqyrymdyq avtojolyn salý men iske qosýǵa baǵyttalǵan. Jabyndysy tsement-betondy avtokólik joly 4 jáne 6 jolaqty bolmaq. Jobanyń quramyna kólik jol aıyryǵy, kópirler, estakadalar, jol kórsetkishteri jáne basqalary engizilgen. Qurylys 2018-2021 jyldar aralyǵynda júrmek. Jobanyń kontsessıoneri - «Alarko-Makyol-SK-Korea Express Way» túrik-koreı konsortsıýmy.