Úlken Almaty aınalma avtojoly Almatynyń kólik júıesine túsetin salmaqty jeńildetedi – mınıstr

ALMATY. QazAqparat - Úlken Almaty aınalma avtomobıl joly Almatynyń kólik júıesine túsetin salmaqty jeńildetedi. Búgin atalmysh joldyń ashylýyna qatysqan Ulttyq ekonomıka mınıstri Álibek Qýantyrov osylaı dedi, dep habarlaıdy QazAqparat.

«Búgin elimizde buryn sońdy bolmaǵan, avtojol salasyndaǵy iri joba óz máresine jetip otyr. Kontsessıoner ashyq jáne eki kezeńdik konkýrstyq rásimder arqyly tańdaldy. Memlekettik-jekemenshik áriptestik mehanızmi boıynsha iske asqan jobanyń mańyzy zor», - dedi Álibek Qýantyrov ÚAAJ-dyń resmı ashylýynda sóılegen sózinde.

UEM basshysy atap ótkendeı, bul joba halyqaralyq ınvestorlar men jetekshi damý bankteriniń úlken qyzyǵýshylyǵyn týdyrdy. Іri ınvestıtsııalyq joba 1 jyl merzimnen ozyp, nebári 3 jyl ishinde iske qosyldy.

«ÚAAJ tehnıkalyq jáne ekologııalyq standarttarǵa sáıkes keledi. Ol senimdi jáne qaýipsiz zamanaýı avtomobıl joly bolyp tabylady. Ásirese, Almaty qalasy men Almaty oblysy turǵyndarynyń erkin qozǵalýyna septigin tıgizeri sózsiz», - dedi mınıstr.

Úlken Almaty aınalma avtojolynyń uzyndyǵy 66 shaqyrym. Sondaı-aq, ol 14 eldi mekendi qamtıtyn Almaty oblysynyń úsh aýdany arqyly ótedi. ÚAAJ Almatynyń kólik júıesine túsetin salmaqty jeńildetedi dep kútilýde. Jobanyń jalpy quny – $743 mln.