Úlken Almaty aınalma avtomobıl jolynda qurylys qarqyny qandaı
NUR-SULTAN. QazAqparat - Búgin Úkimet otyrysynda QR Indýstrııa jáne ınfraqurylymdyq damý mınıstri Roman Sklıar Úlken Almaty aınalma avtomobıl jolyn (ÚAAAJ) salý jumystary týraly baıandady, dep habarlaıdy QazAqparat tilshisi.
«Qazirgi ýaqytta mınıstrlik jetekshilik etetin salalarda memlekettik-jekeshelik áriptestik mehanızmi aıasynda jalpy 32 joba iske asyrylý jáne pysyqtalý satysynda, onyń ishinde 10 joba respýblıkalyq, 22 joba óńirlik deńgeıde», - dep toqtaldy mınıstr.
Onyń sózine qaraǵanda, «Úlken Almaty aınalma avtomobıl jolyn (ÚAAAJ) salý jáne paıdalaný» jobasy boıynsha Kontsessıoner mobılızatsııalyq jumystardy aıaqtap, qurylys montajdaý jumystaryna kiristi. Jol qozǵalysy 2021 jyly ashylatyn bolady. Osy joldaǵy kútiletin trafık táýligine otyz segiz myń avtomobılge jetedi.
Budan bólek, «Almaty - Qorǵas» (Batys Eýropa - Batys Qytaı) avtomobıl joly ýchaskesinde «Nur joly» avtomobıl ótkizý pýnktin salý jáne paıdalaný» jobasy boıynsha nysan 2018 jylǵy 22 maýsymda paıdalanýǵa berildi. Kontsessıoner tarapynan kelisimshart boıynsha alynǵan mindettemeler tolyq kólemde oryndalýda. Búgingi kúni avtokólik quraldaryn tekserý ýaqyty 4 esege qysqardy. Júk tasymaldaýshylar boıynsha táýliktik trafık eki júz avtomobıldi qurady.
R.Sklıar «Túrkistan oblysynyń júrdek avtomobıl joldaryn salý jáne paıdalaný» kontsessııalyq jobasyna toqtala kele: «Joba aıasynda Shymkent jáne Saryaǵash qalalary aınalma joldarynyń qurylysy (150 km) men jalpy qashyqtyǵy 265 sharqyrym joldy paıdalanýǵa berý kózdelýde. Bıyl maýsym aıynda jobany Respýblıkalyq bıýdjettik komıssııa otyrysyna shyǵaryp, konkýrs jarııalaý josparlanǵan», - dedi.
