Úlken Almaty aınalma avtomobıl joly aqyly bolady
ASTANA. QazAqparat - Úlken Almaty aınalma avtomobıl joly aqyly bolady. Bul týraly búgin Úkimet otyrysynda memlekettik-jekeshelik áriptestikti damytý máseleleri boıynsha baıandaǵan QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.
Jeńis Qasymbektiń aıtýynsha, «Úlken Almaty aınalma avtomobıl jolyn salý jáne paıdalaný» jobasy boıynsha 2018 jyldyń 7 aqpanynda mınıstrlik «Alsım Alarko - Makıol - SK - Koreıan EkspressVeı» Konsortsıýmymen kelisimshartqa qol qoıǵan.
«Búgingi kúni tolyqtaı qurylysqa jer bólý máselesi sheshildi. Ýchaskelerge tehnıka men jumysshylardy jumyldyrý tolyqtaı aıaqtaldy, karerler rásimdeldi jáne aǵymdaǵy jyldyń 31 mamyrda qurylys jumystary bastaldy. 2021 jyly qurylys jumystaryn aıaqtap, joldy aqyly negizde paıdalanýǵa berý kózdeledi»,- dedi ol.
Mınıstrdiń dereginshe, qurylys kezeńinde 3 myńǵa jýyq jumys orny ashylady.
«Jol táýligine 38 myń avtokólik quralynyń qala syrtyna shyǵýyna múmkindik beredi jáne qalanyń ekologııasyna oń áser etedi», - dedi Jeńis Qasymbek.
Jalpy onyń dereginshe, Investıtsııalar jáne damý mınıstrligi jetekshilik etetin salalarda memlekettik-jekeshelik áriptestik mehanızmi boıynsha 18 joba pysyqtalyp, iske asyrylyp jatyr. Atap aıtqanda, 3 joba avtomobıl joldary salasynda, 1 joba temirjol kóligi salasynda, 2 joba azamattyq avıatsııa salasynda, 12 joba turǵyn úı-kommýnaldyq sharýashylyǵy jáne energııa únemdeý salalarynda.
