Úlken Almaty ózeniniń jaǵalaýyn abattandyrý jumystary qashan aıaqtalady
ALMATY. KAZINFORM — Úlken Almaty ózeniniń jaǵalaýyn jańartý jumystary 2026 jyly aıaqtalady. Bul týraly Erbolat Dosaev Bostandyq aýdanynyń turǵyndarymen kezdesý barysynda aıtty.

Qala basshysy qazan aıynda Úlken Almaty ózeniniń jaǵalaýyn sý bólgishten Abaı dańǵylyna deıingi 5,7 shaqyrym aýmaqta rekonstrýktsııalaý jumystary bastalǵanyn atap ótti.
Bul jumystarǵa 8 mlrd teńge bólindi.
— Joba aıasynda beton tireýish qurylymdaryn tolyq jańartý, jaıaý júrginshiler kópirlerin, balalar jáne sport alańdaryn, kóshe jıhazdaryn ornatý jáne velojolaqtar salý qarastyrylǵan. Bul jumystardy 2026 jyldyń sáýir aıynda aıaqtaýdy josparlap otyrmyz, — dedi Erbolat Dosaev.
Osyǵan deıin 2025–2027 jyldarǵa arnalǵan tıisti bıýdjet jobasy máslıhat sessııasynda qaralǵan edi.
Aıta ketsek, 2024 jyly Almatynyń Alataý aýdanynda Boraldaı ózeni boıyndaǵy 24 gektar aýmaqty qamtıtyn jasyl aımaqty kóriktendirý aıaqtalǵan bolatyn.
Sondaı-aq Saıran kóliniń jaǵalaýyn abattandyrýǵa 4 mlrd teńge jumsalatyny týraly jazǵan bolatynbyz.