Úlken Almaty ózenin jańǵyrtý jobasy merziminde aıaqtalmady: ákimdik sotqa júgindi
ALMATY. KAZINFORM — Megapolıste Úlken Almaty ózeniniń arnasyn jańǵyrtý jumystary júrip jatyr.
Qalalyq ekologııa jáne qorshaǵan orta basqarmasynyń tapsyrysy boıynsha qolǵa alynǵan qaıta jańǵyrtý jobasy № 1 tundyrǵyshtan bastap Abaı dańǵylyna deıingi bólikte (5,7 km) júrgizilip jatyr. Jobanyń merdigeri — «Pavlodar ózen porty» AQ. Búginge deıin bul joba turǵyndar arasynda kóp synǵa ushyrady. Ásirese, grant plıtalardyń ornyna qoıylǵan materıaldardyń sapasyzdyǵy, jumys alańynda shań kóterilýi, jańadan egilgen aǵashtardyń jaǵdaıy jáne basqa da derekter áleýmettik jelide jıi talqylandy.
Osy oraıda, Kazinform tilshisi Ekologııa jáne qorshaǵan orta basqarma basshysynyń orynbasary Arshat Bahtygereevpen tildesip, jobanyń júzege asyrylýy qandaı satyda ekenin naqtylady. Vedomstvo ókiliniń aıtýynsha, Úlken Almaty ózeni boıyndaǵy jańǵyrtý jumystary shamamen 85-90 paıyzǵa aıaqtalǵan. Biraq bul naqty kórsetkish emes. Sebebi sapasyz istelgen jumystardyń kóbi áli qabyldanbaǵan.
— Nysandaǵy jumys barysy bizdiń kúndelikti nazarymyzda. Basqarma basshylyǵy, bólim mamandary kún saıyn sonda baryp, tekseris júrgizedi. Eger jumys toqtap tursa, merdigerge tezdetý týraly resmı hat joldaımyz. Halyq tarapynan aıtylǵan árbir syndy biz de bilemiz. Biraq biz sapasyz jumysty qabyldaǵan joqpyz jáne eskertýler tolyq jóndelmese qabyldamaımyz. Eń bastysy — biz merdigerge áli kóp aqshasyn tólegen joqpyz. Olarǵa «aldymen jumysyńdy sapaly etip bitir» dep talap qoıdyq, — dedi ol.
Sonymen qatar Arshat Bahtygereev kelisimshart boıynsha nysanda qurylys jumystary 2026 jyldyń 30 mamyrynda bitý kerek ekenin atap ótti. Biraq merdiger uıym belgilengen ýaqyt jumystaryn aıaqtap úlgermegen.
— Merdiger kompanııa jumysty merziminde bitirgen joq. Qazir biz kelisimshart talaptaryna saı ýaqytty sozǵany úshin oǵan ósimpul jiberip jatyrmyz. Bul soma jumystyń qalǵan bóligine tıesili qarajattan paıyz retinde shegerile beredi. Buǵan qosymsha, merdigerdi jaýapkershilikke tartý úshin sotqa aryz joldadyq, — dedi basqarma basshysynyń orynbasary.
Onyń aıtýynsha, Úlken Almaty ózenin jańǵyrtý jobasy boıynsha merdiger uıym memlekettik satyp alý portalyndaǵy reıtıngtik-balldyq júıe arqyly anyqtalǵan. Bul júıe boıynsha baıqaýǵa qatysatyn iri mekemeler arasynan jınaǵan bally joǵary kompanııa avtomatty túrde jeńimpaz atanady.
Arshat Bahtygereev zań boıynsha merdiger atqarylǵan jumysqa 3 jyldyq kepildik beretinin de atap ótti. Aıtýynsha, aldaǵy jyldary jóndelgen aýmaqtyń keı tustary buzylyp jatsa, merdiger ony óz qarajatyna jóndeıdi.
Eske salaıyq, Saıran kóliniń jaǵalaýyn jańǵyrtý jobasyn da «Pavlodar ózen porty» AQ júzege asyrdy. Bul jumystar ýaqytyly ári sapaly oryndalmaǵandyqtan, qala ákimdigi merdigerdi sotqa bergen bolatyn.
