Úlken Almaty ózeni jaǵalaýyn jańǵyrtý jumystary 2026 jyly aıaqtalady
ALMATY. KAZINFORM — Almatyda Úlken Almaty ózeniniń arnasyn qaıta jańǵyrtý jobasy tanystyryldy.
Qalalyq ekologııa jáne qorshaǵan orta basqarmasynyń málimetinshe, qaıta jańǵyrtý 5,7 shaqyrymdyq aýmaqta — № 1 tundyrǵyshtan bastap Abaı dańǵylyna deıingi bólikte júrgizilip jatyr. Joba aıasynda irgeles aýmaqty abattandyrý kózdelgen. Qazirgi tańda jumystardyń 40%-dan astamy oryndalǵan.
Jobanyń merdigeri — «Pavlodar ózen porty» aktsıonerlik qoǵamy. Kompanııa ókili Sergeı Jıtınevtiń aıtýynsha, qaıta jańǵyrtý josparǵa saı júrip jatyr, jobany aıaqtaý 2026 jylǵa josparlanǵan.
— Tehnıkalyq qadaǵalaý jáne memlekettik sáýlet-qurylys baqylaýy tarapynan turaqty baqylaý júrgiziledi. Jumys aıasynda eski ári deformatsııalanǵan granıt taqtalary alynyp, gıdrooqshaýlaǵysh qabaty bar jańa taqtalar ornatylady. Jıektastar jańaryp, júrginshi jáne tehnıkalyq joldar abattandyrylady. Gıdravlıkalyq synaqtardan keıin anyqtalǵan aqaýlar joıylyp, tegisteý qabaty tóseledi, — dep habarlady basqarmadan.
Sondaı-aq jasyl jelekti avtosýarý úshin sorǵy stantsııasy ornatylmaq. Ózen boıyna aǵashtardy egý 2026 jyly kóktemge josparlanǵan.
Eske salaıyq, buǵan deıin osy qurylys alańynan túngi ýaqytta granıt plıtalardyń qulyptas ázirleıtin tsehke tasymaldanyp jatqany týraly beınejazba jarııalandy.
Keıin Almaty ákimdigi týyndaǵan daýǵa baılanysty túsinikteme berdi.
