Úlken Almaty ózeni boıynda adamdar syrǵanaǵan - TJD eskertý jasady

ALMATY. KAZINFORM – Almaty qalasynyń tótenshe jaǵdaılar departamenti turǵyndarǵa eskertý jasady.

TJD málimetinshe, sý aıdyndaryn monıtorıngi barysynda Úlken Almaty ózeniniń bógeti mańynda syrǵanap jatqan demalýshylar anyqtalǵan.

- Bul jaǵdaı aıtarlyqtaı qaýip tóndirdi. Aýa raıynyń turaqsyzdyǵyna baılanysty muzdyń beriktigi tómen. Ol jarylyp, adamdardyń sýǵa qulap ketý qaýpi bar. Ásirese, qutqarý beketteri joq, jedel kómek kórsetý múmkindigi shekteýli aýmaqtar asa qaýipti, - dep habarlady departamentten.

TJD polıtsııa departamentimen birlesip, jazataıym oqıǵalardyń aldyn alýǵa baǵyttalǵan profılaktıkalyq jumystar júrgizgenin habarlady. Departament sý aıdyndaryndaǵy qaýipsizdik erejelerin buzǵany úshin ákimshilik jaýapkershilik kózdelgenin atap ótti. Aıyppul mólsheri — 7 AEK nemese 27 524 teńge.

Eske salaıyq, buǵan deıin qutqarýshylar Almaty taýlarynda aıaǵyn syndyryp alǵan 59 jastaǵy alpınısti evakýatsııalady.