Úlken Almaty kóline kólikpen barýǵa shekteý qoıyldy
ALMATY. KAZINFORM – Úlken Almaty kóline baratyn jolda kólik qatynasyna shekteý qoıyldy. Bul týraly Іle-Alataý memlekettik ulttyq tabıǵı parkiniń Medeý bólimshesine qarasty Úlken Almaty ormanshylyǵynyń mamany Murat Rysqul aıtty.
Іle-Alataý memlekettik ulttyq tabıǵı parkiniń aýmaǵynda qazir 46 týrıstik baǵyt bar, onyń 38-i jumys istep tur. Eń kóp suranysqa ıe baǵyttar Medeý bólimshesinde ornalasqan. Munda barlyq 19 baǵyt jumys isteıdi.
Murat Rysquldyń aıtýynsha, turǵyndar men týrıster arasyndaǵy tanymal baǵyttardyń biri - Úlken Almaty kóli. Ol munda jeke avtokólikterdiń, mototehnıkanyń, sondaı-aq elektrli samokattar, elektrli velosıped pen barlyq kólik quraldarynyń júrýine tyıym salynǵanyn atap ótti.
- Kólge aparatyn jol kúrdeli taý bederi arqyly ótedi. Joldy kórý múmkindigi shektelgen, tas qulaý qaýpi bar ýchaskeler joq emes. Jolda ártúrli kólik aralasyp ketkende jol apaty jıilep ketýi múmkin. Jalǵa alynǵan elektr kólikteri de osyndaı jaǵdaıǵa jıi tap bolady, — dedi ol.
Aıtýynsha, buǵan deıin týrısterdiń elektrobaıkpen nusqaýshysyz júrip, joldan shyǵyp, tabıǵı jamylǵyǵa zııan keltirgeni anyqtalǵan.
- Mundaı jaǵdaı adamnyń ózine ǵana qaýip tóndirmeı, ekojúıege de zııan tıgizedi. Sondyqtan ýákiletti organdarmen birlesip, baqylaýdy kúsheıtip, reıdtik is-sharalar men kezekshilikter engizdik. Bul — tek qaýipsizdik maqsatynda qabyldanǵan májbúrli is-shara, — dedi Murat Rysqul.
Eske salaıyq, bıyl Úlken Almaty kóline deıin jaıaý júrginshiler joly salynatyny belgili boldy.
Buǵan deıin Úlken Almaty kóline aparatyn joldyń jabylýy ekologııaǵa qalaı áser etkenin jazǵanbyz.
