Úlken Almaty kóline deıin jaıaý júrginshiler joly salynady
ALMATY. KAZINFORM – Almatyda qalalyq máslıhattyń kezekten tys sessııasy ótti.
Sessııa barysynda Almaty qalasynyń 2026-2028 jyldarǵa arnalǵan bıýdjetine ózgerister engizý máselesi talqylandy. Almaty qalasy ekonomıka jáne qarjy basqarmasynyń basshysy Baýyrjan Qudaıbergenov ishki bıýdjetti qaıta bólý nátıjesinde jańa jobalarǵa qarjy qarastyrylǵanyn aıtty. Onyń ishinde Úlken Almaty kóline deıin jaıaý júrginshiler jolyn salý jobasy bar. Oǵan 665 mln teńge bólinbek. Al Medeý tabıǵı parkin abattandyrý jobasynyń bastapqy kezeńine 2 mlrd teńge jumsalady.
Buǵan deıin áleýmettik jelide almatylyqtar jaıaý júrginshilerge arnaıy jol bolmaǵandyqtan, Úlken Almaty kóline qaýipti joldarmen shyǵýǵa májbúr ekenin aıtyp shaǵymdanǵan edi.
Eske salaıyq, 2025 jyldyń aqpan aıynda Úlken Almaty kóline aparatyn «Almaty-Kosmostantsııa» avtojoly (8-34 km) QazAvtoJol kompanııasynyń qaramaǵynan Almaty ákimdiginiń menshigine berildi.
Qalalyq týrızm basqarmasy atalǵan ýchaske jol tóseminiń apatty jaǵdaıyna, taý jynystarynyń jáne tas qulaýyna baılanysty avtokólik quraldary úshin jabyq ekenin jáne osy baǵytty jańartý boıynsha jobalaý-smetalyq qujattama ázirlenip jatqanyn málimdedi.
Sondaı-aq Ekologııa jáne tabıǵı resýrstar vıtse-mınıstri Nurken Shárbıev jeke ınvestorlardy tartý arqyly kólge arnaıy ekologııalyq kólikpen (elektrmen júretin kólikter) tasymaldaý jobasyn iske asyrý qarastyrylyp jatqanyn aıtty.