Úlken Almaty kóline aparatyn jańa soqpaq qarasha aıynda ashylady
ALMATY. KAZINFORM — Almatyda jańa «Mármár» týrıstik soqpaǵynyń qurylysy júrip jatyr.
Qalalyq týrızm basqarmasynyń málimetinshe, qazirgi ýaqytta Úlken Almaty kóline tikeleı aparatyn uzyndyǵy 5,3 shaqyrym jańa jaıaý júrginshiler baǵytyn abattandyrý jumystary júrgizilip jatyr. Búgingi tańda jumystardyń 80%-y aıaqtalǵan. Jobany 2026 jylǵy qarasha aıynyń sońyna deıin tolyq aıaqtaý josparlanǵan.
Marshrýt boıynda sholý jáne demalys alańdary, baspaldaqtar, ótkelder, aqparattyq taqtalar men baǵyttaýshy belgiler qarastyrylǵan.
— Jańa soqpaq Almatynyń eń kórikti jerleriniń biri — Úlken Almaty kóline jaıaý barýdy barynsha jaıly, qoljetimdi ári qaýipsiz etedi, — dep habarlady basqarmadan.
Buǵan deıin almatylyqtar Úlken Almaty kóline aparatyn jol qurylysyna shaǵymdandy. Jelide Úlken Almaty kóline jaıaý júrginshiler soqpaǵyn salý kezinde baspaldaqtyń ishine qoqys salynǵany týraly vıdeo jarııalandy. Keıin Almaty qalasynyń týrızm basqarmasy atalǵan ýchaskeni tekserip, tehnologııalyq talaptardyń buzylǵany anyqtalmaǵanyn málimdedi.
Eske salaıyq, Almatydan kólge baratyn jol 2020 jyldan beri jeke kólikter úshin jabyq deýge bolady. Tek 2023 jyly «Almaty–Kosmostantsııa» avtojolynyń 8-34 shaqyrym aralyǵy 1 aıǵa jýyq ashylyp, sol jyldyń qyrkúıeginde qaıta jabyldy.
2025 jyldyń aqpan aıynda «Almaty-Kosmostantsııa» avtojoly (8-34 km) «QazAvtoJol» qaramaǵynan Almaty ákimdiginiń ıeligine berildi.
Bıyl Úlken Almaty kóline deıin jaıaý júrginshiler joly salynatyny belgili boldy.
