Úlken Almaty kanalynyń apatty ýchaskelerin rekonstrýktsııalaý jumysy aıaqtaldy
ASTANA. KAZINFORM - D. Qonaev atyndaǵy Úlken Almaty kanalynyń apatty ýchaskelerin rekonstrýktsııalaý jumystary aıaqtaldy.
Sý resýrstary jáne ırrıgatsııa mınıstrliginiń Sý sharýashylyǵy komıteti D. Qonaev atyndaǵy Úlken Almaty kanalyndaǵy jalpy uzyndyǵy 1,53 shaqyrymdy quraıtyn apatty ýchaskelerdi rekonstrýktsııalaý jumystaryn aıaqtady.
Jobany júzege asyrý nátıjesinde nysannyń tehnıkalyq jaǵdaıy jaqsaryp, sý ótkizý qýaty artty jáne sý shyǵyny azaıdy. Bul Almaty oblysyndaǵy 33,3 myń gektar sýarmaly jerdi sýmen qamtamasyz etý sapasyn jaqsartýǵa múmkindik berdi.
— Rekonstrýktsııalaý aıasynda kanaldyń búlingen ýchaskelerin demontajdaý jáne olardy monolıtti temirbetonmen qaptaý jumystary júrgizildi. Barlyq qurylys-montaj jumysy belgilengen merzimde aıaqtaldy. Sonyń arqasynda bıylǵy vegetatsııa kezeńi ýaqytyly bastaldy, — dedi SRIM Sý sharýashylyǵy komıtetiniń tóraǵasy Arsen Jaqanbaev.
Aıta ketelik elimizdiń ońtústigindegi 103 ırrıgatsııalyq kanaldy avtomattandyrý bastalǵan edi.
