Úlken Almaty kanalyn qaıta jańǵyrtýǵa qosymsha 400 mln teńge qajet
ALMATY. KAZINFORM — Almatynyń ekologııa jáne qorshaǵan orta basqarmasy Dinmuhamed Qonaev atyndaǵy Úlken Almaty kanalyndaǵy jóndeý jumystaryn jalǵastyrý úshin qosymsha 400 mln teńge bólýdi surady.
Depýtattar Máslıhattyń XXXVIII sessııasynda bul qarajattyń naqty qaıda jumsalatynyn jáne jóndeýdiń qashan aıaqtalatynyn surady.
Basqarma basshysynyń mindetin ýaqytsha atqarýshy Mádııar Qojekenovtiń aıtýynsha, Úlken Almaty kanalyna júrgizilip jatqan kúrdeli jóndeý jumystary josparǵa saı oryndalyp jatyr.
— Qonaev atyndaǵy Úlken Almaty kanalyn kúrdeli jóndeý qazir júzege asyrylyp jatyr. Bıylǵa josparlanǵan jumystar tolyq aıaqtaldy. Demontaj, kanal boıyndaǵy arnany mehanıkalyq tazalaý, sondaı-aq búlingen temirbeton bólikterin jóndeý jumystary atqaryldy, — dedi ol.
Onyń sózinshe, basqarma jóndeýdi belgilengen merzimnen buryn aıaqtaýdy josparlap otyr.
— Jyl sońyna deıin ınjenerlik jelilerdi tartý jáne betondaý jumystary jalǵasady. Osy atqarylatyn jumystarǵa keminde 400 mln teńge qajet. Jalpy jumystardyń 35%-y ǵana oryndaldy. Kelisimshart boıynsha nysan 2026 jylǵy qazanda aıaqtalýǵa tıis. Biz jumysty merziminen buryn bitirýge kúsh salamyz, — dedi Qojekenov.
Aıta keteıik, Úlken Almaty kanaly 1980 jyldardyń basynda paıdalanýǵa berilgen. 2025 jyly jazda bastalǵan qaıta jańǵyrtý jumysynyń quny 12,4 mlrd teńge dep baǵalanǵan. Merdiger — Saıran men Úlken Almaty kóli jobalarymen aınalysqan kompanııa, bul jumystar keshiktirilip aıaqtalǵan edi.
Eske salaıyq, buǵan deıin Almatynyń 2025 jylǵy bıýdjetine túzetý engizilgenin jazǵanbyz.