Úlken Almaty kanaly keshendi rekonstrýktsııadan ótedi

Premer-mınıstr Oljas Bektenovtiń gıdrotehnıkalyq nysandardyń jaı-kúıin baqylaýda ustaý jáne transshekaralyq ózenderdegi qaýipterdiń aldyn alý jónindegi tapsyrmasyn iske asyrý aıasynda Sý resýrstary jáne ırrıgatsııa mınıstri Nurjan Nurjigitov Almaty oblysyna jumys saparymen bardy. Vedomstvo basshysy óńirdegi iri sý sharýashylyǵy nysandarynyń jumysymen jáne júzege asyrylyp jatqan ınfraqurylym jobalarynyń barysymen tanysty.

Іle aýdanynda mınıstr syıymdylyǵy 120 mln tekshe metr bolatyn Kúrti sý qoımasynyń jumysyn kórdi. Bul nysan Іle jáne Jambyl aýdandaryndaǵy 13,7 myń gektar sýarmaly jerdi sýmen qamtamasyz etýge múmkindik beredi.

Qazirgi ýaqytta Kúrti sý qoımasy bógetin rekonstrýktsııalaýǵa arnalǵan jobalyq qujat ázirlenip jatyr. Sonymen qatar sekýndyna 309 tekshe metrge deıin sý ótkizýge qaýqarly Kúrti sý qoımasyndaǵy Tasqutan sý kótergish bógetin rekonstrýktsııalaýǵa arnalǵan qujat ta daıyndalyp jatyr.

Budan bólek, Islam damý bankimen birlesip júzege asyrylyp jatqan jobanyń ekinshi transhy aıasynda 2027 jyly jalpy uzyndyǵy 62,3 shaqyrym bolatyn Kúrti ózenindegi oń jaǵalaý jáne sol jaǵalaý magıstraldyq kanaldaryn rekonstrýktsııalaý jumystary bastalady.

Odan keıin mınıstr Eńbekshiqazaq aýdanyna baryp, Shelek ózenindegi Bartoǵaı sý qoımasynyń jumysymen tanysty. Qazirgi tańda nysandy rekonstrýktsııalaýǵa arnalǵan jobalaý-smetalyq qujat ázirlenýde. Joba aıasynda sý qoımasy bógetin nyǵaıtý, sý deńgeıin táýlik boıy baqylaý júıesin engizý, qaqpalardy basqarýdy avtomattandyrý, jergilikti eskertý júıesin ornatý jáne jańa ınfraqurylym salý kózdelgen.

Bartoǵaı sý qoımasy Almaty oblysynyń Eńbekshiqazaq, Qarasaı jáne Talǵar aýdandaryndaǵy 66,3 myń gektar sýarmaly alqapty sýmen qamtamasyz etedi. Nysannyń jobalyq syıymdylyǵy — 320 mln tekshe metr.

Sapar barysynda mınıstr D. Qonaev atyndaǵy Úlken Almaty kanalynyń jalpy uzyndyǵy 1,53 shaqyrym bolatyn ýchaskelerin qaıta jańǵyrtý nátıjelerimen de tanysty. Joba aıasynda kanal arnasy tutas temirbetonmen qaptaldy. Sonyń nátıjesinde nysannyń tehnıkalyq jaı-kúıi jaqsaryp, sý ótkizý qýaty artty, sý shyǵyny azaıdy. Bul óńirdegi 33,3 myń gektar sýarmaly jerdiń sýmen qamtylýyn jaqsartýǵa múmkindik berdi.

Qazirgi ýaqytta uzyndyǵy 15,5 shaqyrym bolatyn kanal ýchaskesin rekonstrýktsııalaý jobasy tolyq ázirlendi. Sonymen qatar jalpy uzyndyǵy 110 shaqyrym bolatyn ýchaskelerdi rekonstrýktsııalaýǵa arnalǵan qujat daıyndalyp jatyr. Bul jumystar Almaty oblysynyń basty sý arnasyn tolyq betondap, zamanaýı talaptarǵa saı jańǵyrtýǵa múmkindik beredi.

Eńbekshiqazaq aýdanynda Nurjan Nurjigitov Baltabaı sýarý alqabyndaǵy jumystardyń barysymen de tanysty. Munda Irrıgatsııa jáne drenaj júıelerin jetildirý jobasynyń ekinshi kezeńi aıasyndaǵy is-sharalar júzege asyrylyp jatyr. Búginde qurylys-montaj jumystarynyń 94%-y oryndalǵan.

Óńirdegi sý sharýashylyǵy nysandaryn aralap shyqqannan keıin Nurjan Nurjigitov «Qazsýshar» RMK-nyń «D. Qonaev atyndaǵy Úlken Almaty kanaly» fılıalynyń qyzmetkerlerimen kezdesti. Mınıstr sala mamandaryn áleýmettik qoldaý baǵytynda júzege asyrylyp jatqan sharalar týraly aıtyp, olardy kele jatqan Sý sharýashylyǵy qyzmetkerleri kúnimen quttyqtady.

— Premer-mınıstr mınıstrlikke gıdrotehnıkalyq nysandardyń jaı-kúıin turaqty baqylaýda ustaýdy, sondaı-aq transshekaralyq ózenderdegi sý shyǵyny men týyndaýy múmkin qaýipter týraly málimettermen úzdiksiz almasýdy uıymdastyrýdy tapsyrdy. D. Qonaev atyndaǵy Úlken Almaty kanaly fılıalynyń nysandary Almaty oblysynyń sý sharýashylyǵy júıesiniń negizi. Sol sebepti barlyq jobanyń sapaly ári ýaqytyly iske asyrylýyn qamtamasyz etý qajet. Mınıstrlik sýdy tıimdi paıdalaný, aýyl sharýashylyǵyn damytý jáne óńirdegi eldi mekenderdiń qaýipsizdigin qamtamasyz etýge baǵyttalǵan bul jumystardyń oryndalýyn erekshe baqylaýda ustaıdy, — dedi Sý resýrstary jáne ırrıgatsııa mınıstri Nurjan Nurjigitov.

Aıta ketelik Qanysh Sátbaev atyndaǵy kanalda 19 sorǵy agregaty jańartylatyny týraly jazǵan edik.